Wedang secang
Wédang secang inggih punika kalebet salah satunggaling jinising unjukan tradhisional Jawa. Dipunsebat wédang secang amargi dipundamel saking taneman secang. Wédang secang inggih dipundamel saking wedang jahe ingkang dipuncampur kaliyan kayu secang.[1] Wédang secang punika kalebet jinis unjukan ingkang saged damel badan kita saras. Raosipun wédang secang punika legi lan kraos anget ing gulu nalika dipununjuk.[1] Wédang secang punika manawi dipuntelisik sujarahipun bilih kala rumiyin wédang secang punika sapisan medal saking kraton, saéngga wédang secang ugi saged dipunwastani unjukan kraton. Ing wekdal sapunika, parutan kayu secang sampun kathah dipunsadé kanthi wujud bungkusan, saéngga langkung gampil dipundamel dados unjukan wédang secang piyambak utawi campuran unjukan sanèsipun kaliyan bumbon crakèn ingkang gadhah pitedah kanggé njagi kasarasan badan.[2]
Bahan-bahan
besutBahan-bahan ingkang dipunbetahaken kanggé damel wédang secang punika inggih kados makaten:[1]
- 100 gr kayu secang
- 100 gr jahé
- 2 lèr serèh
- 10 gr kayu legi
- 5 gr cengkèh
- 200 gr gendhis pasir
- 2 liter toya
Caranipun damel
besutCaranipun damel wédang secang punika gampil sanget lan sadaya tiyang saged kanthi gampil damel piyambak. Ing ngandhap punika inggih tata cara damel wédang secang:[3]
- Nggodhog toya rumyin, lajeng sadaya bahan-bahanipun dipunlebetaken sak sanèsipun gendhis pasir. Lajeng sadaya bahan kala wau dipungodhog ngantos umub.
- Manawi toyanipun sampun malih dados warna ungu nembé gendhis pasir dipunlebetaken.
- Wédang secang sampun samekta dipununjuk.
Saranipun
besutSaénipun wédang secang dipununjuk nalika taksih bentèr. Lan wédang secang badhé langkung nikmat dipununjuk manawi dipunsimpen wonten ing poci ingkang dipundamel saking siti. Raosipun badhé langkung kraos tradhisional.
Pitedah
besutWédang secang gadhah pitedah ingkang kathah, mliginipun saé kanggé badan kita. Sapérangan pitedahipun wédang secang inggih saged nambani masalah keséhatan kados ta nambani masalah gangguan pembuluh getih koroner ingkang sansaya ciyut. Lajeng, saged ngirangi tekanan darah saéngga getihipun saged lancar.[4] Kajawi punika, wédang secang ugi gadhah kasiyat kanggé ngicalaken pegel linu, saged nambahi stamina badan kita, saged njadi kasarasan lan daya tahan badan kita, ugi saged nambani lelara asem urat manawi dipununjuk saben dinten.[5] Wédang secang punika saé dipununjuk saben dinten amargi saged damel badan anget saéngga saged ngicalaken masuk angin ingkang nembé dipunraosaken badan.
Cathetan suku
besut- ↑ a b c [1] (dipunundhuh tanggal 27 Novèmber 2012)
- ↑ "Archive copy". Diarsip saka sing asli ing 2013-04-17. Dibukak ing 2012-11-27.
{{cite web}}: CS1 maint: archived copy as title (link) - ↑ "Archive copy". Diarsip saka sing asli ing 2013-06-25. Dibukak ing 2012-11-27.
{{cite web}}: CS1 maint: archived copy as title (link) - ↑ "Archive copy". Diarsip saka sing asli ing 2011-02-17. Dibukak ing 2012-11-27.
{{cite web}}: CS1 maint: archived copy as title (link) - ↑ [2]