André-Georges Haudricourt

André-Georges Haudricourt ya iku ahli antropologi saka Paris, Prancis, kalairan ing taun 1911. Pandhidhikan pawiyatan luhur André iki olèh saka Diplôme de l’Institut d’Agronomique de Grignon ing taun 1931. Sabanjuré ing Diplôme de phytopathologie et de génétique, Paris, taun 1932, Diplôme de la IV éme section de l’École Pratique des Hautes Études, Paris (taun 1945), lan Doctorat d’État ès Lettres, EHESS, ing taun 1972. Panlitian lapangan kang linakonan déning André-Georges naté ana ing Leningrad, Ruslan (taun 1934), Hanoi, Vietnam (taun 1948), Hangzhous Cina (taun 1955), Kaledonia Anyar (taun 1959), Caobang. Viètnam (taun 1973), lan Tokyo, Jepang (taun 1978). Karya-karya akademis kang sinerat déning André-Georges iki ya iku L’Homme et les plantes cultivées (Man and Cultivated Plants) taun 1943, L’Homme et la charrue (Man and the Plough around the World) ing taun 1955, Problème de phonologie panchronique (The Problem of Panachronic Phonology) ing taun 1978, lan Les Pieds sur terre (One’s Feet Firmly on the Ground) ing taun 1987. Awalé André iki digladhén minangka insinyur agrikultural. Dhèwèké miwiti sinau antropologi marang Marcel Mauss ing taun 1932. Dhèwèké uga ana pisumbangané ing bab ètnolinguistik.