Begawan Animandaya
Begawan Animandaya utawa Begawan Animandawya iku pandhita kang ngalami panandhang disuduk bokonge nganggo lembing, awit ngundhuh wohing panggawene nalika isih cilik. Critane mangkene: Sawijining dina Begawan Animandaya nglakoni tapa mbisu. Ndilalah ana maling nggawa barang oleh-olehane mlebu ing padhepokane Begawan Animandaya. Ora let suwe katungka praptane wadyabala Magada sing ngoyak playune maling. Tetunggule prajurit nyuwun priksa marang Sang Begawan, menyang ngendi playune maling. Begawan Animandaya ora wangsulan. Para prajurit Magada nuli padha lumebu jroning padhepokan. Kabeh isining padhepokan digeledhah. Wasana malinge ketemu, ndelik ing longan ngisor pasareane Sang Begawan. Maling dicekel lan dibanda, terus diglandhang ing ngarsane ratu Magada. Karampungane, maling iku diukum kisas (ukum pati).
Begawan Animandaya kena dakwa mbiyantu maling. Sang Begawan dirangket, dilarak ing ngarsane Sang Prabu. Putusane pengadilan, Begawan Animandaya kapatrapan pidana ditancepi lembing bokonge. Awit saka genturing kasutapane, senadyan bokonge ditancepi lembing nganti jero, Sang Begawan ora seda.
Para resi mitrane Sang Begawan padha tilik lan nakokake apa sababe nganti nampa paukuman kang kaya mangkono abote. Sang Begawan mratelakake yen ora mraduli marang maling kang lumebu ing padhepokane, lan ora mangsuli pitakone prajurit Magada, amarga pinuju nglakoni tapa mbisu. Para resi mau banjur sowan Sang Prabu, ngaturake kabeh pangandikane Begawan Animandaya.
Sang Prabu banjur paring dhawuh marang wadyabala, supaya ngluwari Begawan Animandaya. Lembing kang wis sawetara dina tumancep ing bokonge Sang Begawan, didudut. Nanging ora bisa diuwali, mula banjur ditugel. Sang Begawan ngrasakake sewu lara dadi siji. Para resi mitrane Begawan Animandaya nuli padha mateg mantram sakti. Wusana pucuking lembing kang isih ana ing sajroning awake Sang Begawan banjur metu liwat embun-embunane.
Sawise Begawan Animandaya luwar saka panandang, para resi banjur padha munggah kahyangan, nemoni Bathara Dharma. Nyuwun priksa sababe Begawan Animandaya nganti ngalami panandhang abot.
Bathara Dharma mangsuli, yen Begawan Animandaya ngundhuh wohing pakarti. Biyen nalika isih cilik kerep dolanan kinjeng, disuduk silite. Mula wis trep yen Sang Begawan ngalami kaya nasibe kinjeng, disuduk bokonge. Kuwi jenenge hukum karma.
Para resi matur yen Bathara Dharma ora adil. Miturut wewarah suci, bocah cilik sing umure kurang saka 14 taun, yen tumindak luput, durung kena diukum, amarga bocah sing durung diwasa iku durung bisa mbedakake ala bener, becik lupute. Hukum karma ora mung mligi kanggo manungsa ing marcapada, nanging uga tumrap para dewa. Amarga Bathara Dharma tumindak luput, matrapi pidana marang wong kang ora samesthine kapidana, Bathara Dharma didongakake bakal manjanma ing marcapada dadi wong pincang, lair saka guwa garbane wanita darah sudra.
Ucape para resi iku dadi kasunyatan. Bathara Dharma manjanma ing marcapada dadi Yamawidura.