Brem
Brem yaiku panganan tradhisional kang digawé saka asil fermèntasi ketan. Ana loro jinisé brem, yaiku brem kang padhat akèh ditemoni ing Madiun lan Wanagiri, lan brem kang dhapuré cuèr ana ing Bali.
Brem kang dhapuré padhat dikenal ana ing laladan Madiun lan Wanagiri. Brem kang ana ing Madiun asalé saka Désa Bancong lan Kaliabu, Kecamatan Caruban, Kabupatèn Madiun, Jawa Timur. Brem kang saka Madiun dhapuré kothak gèpèng, warnané rada kuning, ukurané rata-rata 15 cm x 5 cm x 0,5 cm. Brem kang asalé saka Wanagiri, Jawa Tengah, dhapuré bunder gèpèng, warnané putih, dhiamèteré kira-kira 5 cm lan kandelé kira-kira 0,3 cm. Brem kang dhapuré padhat rasané legi, nalika dipangan rasané semriwing lan langsung ajèr. Brem kang dhapuré cuèr asalé saka Bali lan Nusa Tenggara, brem kang saka Bali warnané putih kaya susu, minangka kang saka Nusa Tenggara warnane abang.