Changnyeong
Changnyeong (창녕군) inggih punika satunggaling kabupatèn ingkang mapan wonten ing provinsi Gyeongsang Kidul, Koréa Kidul.[1] Kabupatèn punika gadhah wewengkon perlindungan alam alasan ingkang taksih alami lan situs-situs kuna mawi sajarah.[1] Nakdong-gang, lèpèn paling dawa wonten wonten ing Koréa Kidul, mili nglewati wewengkon punika sadèrèngipun tumuju muara dhateng Selat Koréa.[1]
Rawa Upo
besutRawa Upo (우포늪) inggih punika rawa ingkang mapan wonten ing wewengkon Kabupatèn Changnyeong.[2] Rawa punika kalebet péranganing dhataran teles lan rawa paling wiyar ing Koréa ingkang ginanipun kanggé papan nglestantunaken ékologi.[3] Rawa Upo sareng kaliyan tlatah rawa sanèsipun ing wewengkon punika, kados Mokpo, Sajipo, lan Jjokjibeol dipunparingi nama sistem Rawa Upo.[2] Wiyaripun sadaya Rawa Upo punika dumugi 2 juta m².[1]
Tilaran sajarah
besut
Changnyeong punika kathah tilaran sajarah kados ta:
- Changnyeong Seokbinggo utawi Griya Es Changnyeong punika jinising gudhang ing nginggilipun lemah ingkang dipun-ginakaken kanggé nyimpen watu ès.[1] Seokbinggo dipunyasa nalika masa Dinasti Joseon (1392-1910) lan kalebet Harta Nasional Koréa Kidul No.310.[1]
- Cheok-gyeongbi (monumen watu) inggih prasasti ingkang dipunyasa déning Raja Jinheung saking Silla.[1] Monumèn punika kalebet harta nasional nomer 33 lan mapan wonten ing taman Manokjeong, kutha Changnyeong.[1] Cheok-gyeongbi jumeneng ing taun 561 kanggé mengeti penaklukkan Silla awit saking kraton Bihwa Gaya.[1]
- Changnyeong cheok-hwabi punika salah satunggaling monumèn ingkang dipunyasa déning Heungseon Daewongun (bapak Kaisar Gojong) nalika taun 1871 ing sadaya nagari minangka lambang nentang marang imperialisme kulon.[1]
- Changnyeong-gaeksa punika yasan panyipengan tuwa ingkang jumeneng kirang langkung 300 taun kepengker.[1] Wangunan ingkang dipundamel tanpa ngginakaken piranti paku punika sampun bola-bali dipunpindhah lan dipunyasa malih, nanging taksih nedahaken arsitèktur ingkang asli.[1]
- Pagoda tiga tingkat ing désa Suljeong. Pagoda punika dipunanggep sami éndahipun kaliyan Pagoda Seokga ing Kuil Bulguk ing Gyeongju lan dipunyasa kanthi wekdal ingkang sami, nanging pérangan pucukipun boten kantun malih. Jejulukipun punika Pagoda Wétan.
- Kompleks Gundukan Makam Gyodong.[4] Situs makam punika kalebet Situs Mawi Sajarah Koréa Kidul No.80 ingkang ndhapuk gundukan-gundukan bukit alit ingkang kalebet tilaran Karajan Bihwa Gaya.[4]
- Museum Changnyeong inggih punika musiyum ingkang nedahaken 1.012 artefak tilaran Karajan Bihwa Gaya.[1]
- Gwallyongsa utawi Kuil Gwallyong inggih punika kuil ingkang mapan wonten ing sikiling Gunung Hwawang.[1] Kuil punika dipunyasa nalika masa kraton Silla.[5] Aula utami kuil, Yaksa-jeon sarta patung Buddhanipun kalebet harta nasional.[5]
Hwawangsan
besut
Hwawangsan utawi Gunung Hwawang inggih punika gunung kanthi inggil 2.600 mèter lan kondhang minangka objek wisata amargi sesawanganipun.[1] Nalika mangsa semi, Hwawangsan kebak kaliyan kembang azalea kanthi warna ungu.[6] Déné nalika mangsa panas saking wewatuan punika medal tuk (mata air).[1] Ing mangsa palastra gegodhongan ing gunung punika wonten wernanipun lan padang suketipun dados kuning kados emas ugi kebak kaliyan kembang eulalia.[1][6] Ing gunung punika saben taun dipunwontenaken festival kembang api.[1] Ing Hwawangsan wonten Bèntèng Hwawangsan ingkang dipunyasa déning Jenderal Gwak Jae-u nalika masa Dinasti Joseon minangka perlindungan ing masa Invasi Jepang dhateng Koréa ing taun 1592.[6]
Cathetan suku
besut| Wikimedia Commons duwé médhia ngenani Category:Changnyeong, Gyeongsangnam-do. |
- ↑ a b c d e f g h i j k l m n o p q r Bae Han-Bong (Summer 2007). "Changnyeong—Reminders of the Past Offer Hope for the Future" (PDF). Koreana. 21: 65–73.[pranala mati permanèn]
- ↑ a b Lee, Yong-su (Autumn 2000). "Upo Wetlands" (PDF). Koreana. 14. Diarsip saka sing asli (PDF) ing 2016-03-05. Dibukak ing 2013-03-24.
- ↑ Telur burung ibis berjambul berhasil ditetaskan di rawa Upo[pranala mati permanèn], kbs.
- ↑ a b Changnyeonggyodonggobungun (Ancient Tombs in Gyo-dong, Changnyeong)[pranala mati permanèn], ocp.go.kr.
- ↑ a b Gwallyongsaseokjoyeoraejwasang (Seated stone buddha statue of Gwallyongsa Temple), jikimi.cha.go.kr.
- ↑ a b c Mt. Hwawangsan[pranala mati permanèn], san.go.kr.
Pranala njawi
besut- Nature Tour to Changnyeong-gun Archived 2011-08-29 at the Wayback Machine.