Helene

Helene (Basa Yunani : Ἑλένη, Helénē) utawi ingkang langkung kawéntar kanthi nama Helene saking Troya lan Helene saking Sparta punika satunggaling tokoh wanita ingkang kondhang ing mitologi Yunani ^[1].

Tiyang sepuhipun punika Tindareus lan Leda lan sedhèrèk saking Kastor, Polideukus, lan Klitemnestra ^[2], nanging bapak biologisipun punika déwa Zeus ingkang merkosa Leda kanthi wujud kéwan banyak (angsa). Ing versi sanèsipun, Helene punika laré èstri saking Zeus lan dewi Nemesis. Helene wiyos saking tigan lan kalebet sedhèrekipun Klitaimnestra lan Dioskuri (Kastor lan Polideukes). Helene punika gadhah praupan ingkang ayu, ugi wonten ing mitologi punika Helene mau minangka wanita paling ayu ing donya saéngga kathah raja ing Yunani ingkang remen, nanging ing pungkasan Helene punika kagarwa Menelaos saking Sparta. Paris satunggaling pangeran Troya mbeta kesah Helene saking Sparta saéngga damel Menelaor murka ugi Troya dipunserang déning para raja ing Yunani lan kadadosan Perang Troya. Sasampunipun Troya risak, Helene kondur malih dhateng Sparta sesarengan kaliyan garwanipun.

Cathetan tuwa dhéwé babagan Helene punika wonten ing sajak-sajak karyanipun Homeros lan mitos babagan Helene saged ugi asalipun saking Zaman Mykenai. Ing Yunani Kuno, Helene ugi dipunsembah wonten ing kuil lan suaka. Pusat kanggé muja Helene punika wonten ing Sparta. Lajeng cariyos kesahipun Helene kaliyan Paris punika dados tema ingkang kondhang ing seni visual. Panggambaranipun asring medal wiwit saking lukisan guci Yunani Kuno dumugi lukisan nalika masa Renaisans.

Asal mula

Mitos Helene punika asalipun saking Zaman Mykenai. Cathetan tuwa dhéwé babagan Helene punika wonten ing sajak-sajak karyanipun Homeros, nanging para sejarawan gadhah pamanggih bilih mitos mau dipuntampi déning Bangsa Yunani Mykenai saderengipun dugi dhateng Homeros. Wonten ing mitologi, papan wiyosipun Helene punika wonten ing Sparta nalika Zaman Pahlawan ingkang kathah medal wonten ing mitologi Yunani. Zaman Pahlawan ingkang dipunpitadosi déning tiyang Yunani Kuno ingkang sapunika dipunwastani jaman Perunggu Mykenai déning para sejarawan. Para raja, ratu, lan pahlawan ing Siklus Troya asring sesambetan kaliyan para déwa amargi asal-usuling mitos ingkang paring derajad langkung inggil ing para leluhur pahlawan bangsa Yunani.

Pagesangan

Wiyos

Saking kathah sumber, kalebet Iliad lan Odisseia Helene punika lare èstri Zeus lan Leda, garwa Raja Sparta, Tindareus ^[3]^[4]^[5]^[6]^[7]^[8]. Sandiwara karyanipun Euripides, Helene dipunserat nalika pungkasan abad kaping 5 SM dados sumber tuwa dhéwé ingkang nyariosaken wiyosipun Helene bilih : sanajan bapakipun punika Tindaerus, nanging Helene punika putri Zeus. Kanthi wujud banyak (angsa), Zeus dipunuyak déning manuk garudha lan dipunslametaken déning Leda. Sasampunipun celak kaliyan Leda banjur dipunperkosa. Leda nglairaken satunggal tigan ingkang dados Helena.

Cathetan suku

↑ [1] Archived 2013-04-13 at the Wayback Machine. (id) Helene (dipunakses tanggal 26 Januari 2013)
↑ [2] Archived 2013-07-27 at the Wayback Machine. (id) 5 Hasil rampasan dari peperangan (dipunakses tanggal 26 Januari 2013)
↑ Homeros, Iliad, III, 199
↑ Homeros, Iliad, 418
↑ Homeros, Iliad, 426
↑ Homeros, Odisseia, IV, 184
↑ Homeros, Odisseia, IV, 219
↑ Homeros, Odisseia, XXIII, 218

[helene1-1] [1] Archived 2013-04-13 at the Wayback Machine. (id) Helene (dipunakses tanggal 26 Januari 2013)

[helene2-2] [2] Archived 2013-07-27 at the Wayback Machine. (id) 5 Hasil rampasan dari peperangan (dipunakses tanggal 26 Januari 2013)

[3] Homeros, Iliad, III, 199

[4] Homeros, Iliad, 418

[5] Homeros, Iliad, 426

[6] Homeros, Odisseia, IV, 184

[7] Homeros, Odisseia, IV, 219

[8] Homeros, Odisseia, XXIII, 218

[1]

[2]

[3]

[4]

[5]

[6]

[7]

[8]