Kuil Bulguk

Sana Warisan Donya UNESCO
Seokguram Grotto and Bulguksa
Janeng ing Pratélan Warisan Donya
Jinis	Kultural
Wewaton	i, iv
Rujukan	736
Tlatah UNESCO	Asia-Pasifik
Sujarah prasasti
Prasasti	1995 (Sési Ke-19)

Bulguksa utawi Kuil Bulguk (佛國寺; "Kuil Negeri Buda") inggih punika kuil Buda utami saking Sekte Jogye. Bulguksa mapan wonten ing Gyeongju, Provinsi Gyeongsang Kidul, Koréa Kidul. Kuil punika wigati sanget amargi kalebet situs tilaran sajarah wiwit saking jaman kraton Silla, sarta nyimpen 7 harta nasional Koréa Kidul ingkang taksih saé. Bulguksa dipundamel kategori minangka Situs Bersejarah dan Indah No.1 déning pamaréntah Koréa Kidul.^[1] Sareng kaliyan Seokguram, papan ziarah ing Gunung Toham, Bukguksa dados Situs Warisan Donya UNESCO nalika taun 1995.^[2]

Kuil Bulguk jumeneng nalika taun 751 nalika masa papréntahan Gyeongdeok saking Karajan Silla déné pambangunanipun dipunkonstruksi déning nayakotama Kim Daeseong. Pambangunan mau rampung nalika taun 774 bibar sédanipun Kim lajeng dipunparingi nama Bulguksa. Kuil Bulguk naté dipunrenovasi nalika jaman Goryeo lan wiwitan Dinasti Joseon. Nanging nalika masa Invasi Jepang taun 1592-1598 kuil punika kénging kerisakan. Rekonstruksi malih dipunwontenaken kaping 40 antawisipun taun 1604 dumugi aun 1805. Renovasi ugi dipunwontenaken nalika jaman penjajahan Jepang nanging wonten sapérangan kuil ingkang miturut kabar ical amargi risak. Restorasi bibar Perang Dunia II lan Perang Koréa dipunlampahi nalika taun 1966. Lan nembé ing antawisipun taun 1969 lan 1973, almarhum Présidhèn Park Chung Hee gadhah usaha kanggé restorasi kanthi ageng dumugi strukturipun kados ingkang wonten sapunika. Pérangan-pérangan pagoda watu dipunkonduraken kados rumiyinipun. Kuil punika mapan wonten ing ngandhap Gunung Toham lan sapunika dados kuil utami distrik kaping 11 saking Sekte Jogye.

Struktur

Gerbang mlebet dhateng kuil punika Sokgyemun. Gerbang Sokgye lan tangga watu tumuju kuil punika arsitèktur ingkang dados péranganing harta nasional nomer 23. Tangga ngandhap dipunsebat Cheong-ungyo ("Kreteg Awan Biru"), dawanipun 6,3 mèter kanthi gunggung 17 pidakan. Krerteg nginggil dipunsebat Baek-ungyo ("Kreteg Awan Putih"), dawanipun 6,3 mèter lan gunggungipun pidakan punika wonten 16. Pidakan kalih kreteg punika 33 pidakan minangka lambang 33 tahap pancerahan wonten ing ajaran Buda. Kreteg punika madep ing lawang Gerbang Jaha.

Bulguksa gadhah kalih pagoda watu, Seokgatab lan Dabotab. Seokgatab dipunsebat ugi kaliyan "Pagoda Sakyamuni" mawi 3 tingkap, dhuwuripun 8,2 mèter. Arsitektur Seokgatab langkung prasaja tinimbang Dabotab amargi boten kathah ukiran. Pagoda kados punika kalebet tipikal pagoda ing sapérangan ageng kuil Buda ing Koréa, nanging bénten kaliyan Dabotab ingkang dados satunggaling pagoda ing Koréa ingkang mawi arsitèktur kathah ornamènipun. Dabotab utawi "Pagoda mawi kathah kasugihan (harta)" dhuwuripun 10,4 mèter. Kalih pagoda punika kalebet harta nasional angka 20 lan 21.