Mateus 1

Mateus 1 (disingkat Mat 1) yaiku pasal kapisan Injil Matius ing Prajanjian Anyar Alkitab. Dituli rasul Matius, salah sijining rasul mula-mula Yesus.

Teks

• Artikel iki dipérang dadi 25 ayat lan dumadi saka rong bagéan:
  • Pérangan pisanan (ayat 1-17) yaiku Sarasilahe Gusti Yesus saka sisih bapa, Yusuf, tedhak turuné Dawud, wiwit saka Abraham .
  • Pérangan kapindho (ayat 18-25) nyathet lairé Gusti Yésus saka ibuné, Maria prawan.
  • Pratelan pasal:
    • Mateus 1:1-17: Sarasilahe Gusti Yesus
    • Mateus 1:18-25: Miyose Gusti Yesus

Isi

Versi	Isi
Jawa 1981	Sarasilahe Gusti Yesus 1Iki sarasilahe Gusti Yesus Kristus, tedhake Sang Prabu Dawud, tedhake Rama Abraham. 2Rama Abraham peputra Iskak, Iskak peputra Yakub, Yakub peputra Yahuda sasadhereke; 3Yahuda peputra Peres lan Zerah, patutan saka Tamar; Peres peputra Hezron, Hezron peputra Ram; 4Ram peputra Aminadab, Aminadab peputra Nahason, Nahason peputra Salmon; 5Salmon peputra Boas patutan saka Rakhab; Boas peputra Obed patutan saka Rut; Obed peputra Isai, 6Isai peputra Sang Prabu Dawud, Sang Prabu Dawud peputra Sang Prabu Suleman, patutan saka tilas bojone Uria, 7Sang Prabu Suleman peputra Rehabeam, Rehabeam peputra Abia, Abia peputra Asa, 8Asa peputra Yosafat, Yosafat peputra Yoram, Yoram peputra Uzia; 9Uzia peputra Yotam, Yotam peputra Akhas, Akhas peputra Hizkia; 10Hizkia peputra Manasye, Manasye peputra Amon, Amon peputra Yosia; 11Yosia peputra Yekhonya sasadhereke, nalika jaman pambuwangan menyang Babil. 12Sawise jaman pambuwangan menyang Babil, Yekhonya peputra Sealtiel, Sealtiel peputra Zerubabel; 13Zerubabel peputra Abihud, Abihud peputra Elyakim, Elyakim peputra Azor; 14Azor peputra Zadhok, Zadhok peputra Akhim, Akhim peputra Eliud; 15Eliud peputra Eleazar, Eleazar peputra Matan, Matan peputra Yakub; 16Yakub peputra Yusuf bojone Maryam, kang mbabar Gusti Yesus, kang jejuluk Sang Kristus. 17Dadi gunggunge saka Rama Abraham tumeka Sang prabu Dawud iku ana patbelas turunan, saka Sang Prabu Dawud tumeka ing jaman pambuwangan menyang Babil ana patbelas turunan lan saka jaman pambuwangan menyang Babil tumeka Sang Kristus patbelas turunan. Miyose Gusti Yesus 18Anadene miyose Gusti Yesus Kristus iku sejarahe mangkene: Nalika Maryam kang ibu lagi pacangan karo Yusuf, sadurunge tunggal sapaturon, tinemu wus ngandheg marga saka Sang Roh Suci. 19Sarehne Yusuf bojone iku wong mursid sarta ora gelem mirangake Maryam ana ing ngarepe wong akeh, mulane sumedya medhot pepacangane kanthi sidheman. 20Nanging bareng lagi duwe gagasan mangkono iku, tumuli ana malaekating Pangeran ngatingali sajroning pangimpen, dhawuhe: “He, Yusuf, tedhake Dawud, aja sumelang anggonmu ngepek Maryam dadi bojomu, awit Putra kang kabobotake iku marga saka Roh Suci, 21sarta Maryam bakal mbabar putra kakung, iku namakna Yesus; awit iya iku kang bakal ngluwari bangsane saka ing dosane.” 22Bab iku anggone kalakon supaya kayektenana apa kang kapangandikakake dening Pangeran lumantar nabi mangkene: 23“Lah, sang kenya bakal nggarbini sarta mbabar putra kakung, kang asmane bakal sinebut Emanuel, tegese: Gusti Allah nunggil kalawan kita.” 24Yusuf satangine turu banjur ngestokake kaya kang didhawuhake dening malaekating Pangeran, Maryam dipek bojo, 25nanging ora diwori turu, nganti tumekane wis mbabar putra, kang banjur dinamakake Yesus.
Jawa 1994	1Iki sarasilahé Gusti Yésus Kristus. Gusti Yésus kuwi tedhak-turuné Prabu Dawud. Prabu Dawud tedhak-turuné Bapak Abraham. 2Bapak Abraham peputra Iskak. Iskak peputra Yakub. Yakub peputra Yéhuda sasedulur. 3Yéhuda peputra Pèrès lan Zérah, patutan saka Tamar; Pèrès peputra Hèzron. Hèzron peputra Ram. 4Ram peputra Aminadab. Aminadab peputra Nahason. Nahason peputra Salmon. 5Salmon peputra Boas, patutan saka Rahab. Boas peputra Obèd, patutan saka Rut. Obèd peputra Isai. 6Isai peputra Dawud. Dawud peputra Suléman, patutan saka tilas bojoné Uria. 7Suléman peputra Réhabéam. Réhabéam peputra Abia. Abia peputra Asa. 8Asa peputra Yosafat. Yosafat peputra Yoram. Yoram peputra Uzia. 9Uzia peputra Yotam. Yotam peputra Akhas. Akhas peputra Hizkia. 10Hizkia peputra Manasyè. Manasyè peputra Amon. Amon peputra Yosia. 11Yosia peputra Yékhonya sasedulur. Nalika semono bangsa Israèl ana ing pembuwangan ing tanah Babil. 12Ana ing tanah Babil kono Yékhonya peputra Séaltièl. Séaltièl peputra Zérubabel. 13Zérubabel peputra Abihud. Abihud peputra Èlyakim. Èlyakim peputra Azur. 14Azur peputra Zadhok. Zadhok peputra Akhim. Akhim peputra Éliud. 15Éliud peputra Èléazar. Èléazar peputra Matan. Matan peputra Yakub. 16Yakub peputra Yusuf. Yusuf kuwi garwané Maryam. Maryam iki sing mbabar Gusti Yésus, sing disebut Mèsias (Tembung Ibrani ‘Mèsiah’ kuwi basané Yunani ‘Kristus’.) 17Dadi saka Bapak Abraham tekan Prabu Dawud, kabèh ana patbelas turunan, saka Prabu Dawud tekan jaman pembuwangan menyang tanah Babil ana patbelas turunan. Semono uga saka jaman pembuwangan menyang tanah Babil tekan wiyosé Sang Kristus ana patbelas turunan. 18Anadéné wiyosé Gusti Yésus Kristus kuwi kelakoné mengkéné: Nalika Maryam ibuné Gusti Yésus isih pacangan karo Yusuf, lan durung padha ningkah, Maryam wis mbobot merga saka pangwasané Sang Roh Suci. 19Sarèhné wong mursid, Yusuf ora gelem gawé wirangé Maryam ana ing ngarepé wong akèh; mula thukul gagasané arep medhot enggoné pepacangan karo Maryam mau kanthi meneng-menengan. 20Nanging bareng lagi nggagas-nggagas mengkono, banjur ana Malaékaté Pangéran nemoni Yusuf sajroning impèn. Malaékat mau ngandika: "Yusuf, tedhak-turuné Dawud, kowé aja mangu-mangu ngepèk Maryam dadi bojomu, awit bayi sing ana ing wetengané kuwi asalé saka pangwasané Sang Roh Suci. 21Maryam bakal mbabar putra kakung. Bayi kuwi namakna Yésus, awit iya Panjenengané kuwi sing bakal nylametaké umaté saka ing dosané." 22Kuwi mau kabèh supaya kelakon sing dingandikakaké déning Pangéran lantaran nabiné, mengkéné: 23"Bakal ana prawan mbobot, sarta mbabar putra kakung, kang bakal dinamakaké Immanuèl." (‘Immanuèl’, kuwi basa Ibrani, tegesé: ‘Allah nunggil karo kita’.) 24Sawisé tangi, Yusuf banjur nglakoni kaya sing didhawuhaké déning Malaékaté Pangéran mau. Maryam banjur diningkah, 25nanging ora diwori turu nganti tumekané babaran. Putrané kakung; Yusuf namakaké putra mau Yésus.
Jawa 2006	1Iki sarasilahé Yésus Kristus, tedhaké Daud, tedhaké Abraham. 2Abraham peputra Ishak, Ishak peputra Yakub, Yakub peputra Yéhuda sasadhèrèké; 3Yéhuda peputra Pèrès lan Zérah, patutan saka Tamar; Pèrès peputra Hèzron, Hèzron peputra Ram; 4Ram peputra Aminadab, Aminadab peputra Nahason, Nahason peputra Salmon; 5Salmon peputra Boas patutan saka Rahab; Boas peputra Obèd patutan saka Rut; Obèd peputra Isai, 6Isai peputra Daud, Daud peputra Salomo, patutan saka tilas bojoné Uria, 7Salomo peputra Réhabéam, Réhabéam peputra Abia, Abia peputra Asa, 8Asa peputra Yosafat, Yosafat peputra Yoram, Yoram peputra Uzia; 9Uzia peputra Yotam, Yotam peputra Akhas, Akhas peputra Hizkia; 10Hizkia peputra Manasyé, Manasyé peputra Amon, Amon peputra Yosia; 11Yosia peputra Yékhonya sasadhèrèké, nalika jaman pambuwangan menyang Babil. 12Sawusé jaman pambuwangan menyang Babil, Yékhonya peputra Séaltièl, Séaltièl peputra Zèrubabél; 13Zèrubabél peputra Abihud, Abihud peputra Élyakim, Élyakim peputra Azor; 14Azor peputra Zadok, Zadok peputra Akhim, Akhim peputra Éliud; 15Éliud peputra Éléazar, Éléazar peputra Matan, Matan peputra Yakub; 16Yakub peputra Yusuf bojoné Maria, kang mbabar Yésus, kang sinebut Kristus. 17Dadi gunggungé saka Abraham tumeka Daud iku ana patbelas turunan, saka Daud tumeka jaman pambuwangan menyang Babil ana patbelas turunan lan saka jaman pambuwangan menyang Babil tumeka Sang Kristus patbelas turunan. 18Anadéné wiyosé Yésus Kristus iku kalakoné mangkéné: Nalika Maria kang ibu lagi pacangan karo Yusuf, sadurungé tunggal sapaturon, tinemu wis ngandheg marga saka Roh Suci. 19Sarèhné Yusuf bojoné iku wong mursid sarta ora gelem mirangaké Maria ana ing ngarepé wong akèh, mulané sumedya medhot pacangané kanthi sesidheman. 20Nanging bareng lagi duwé gagasan mangkono iku, tumuli ana malaékating Pangéran ngatingali sajroning pangimpèn, dhawuhé, "Hé, Yusuf, tedhaké Daud, aja sumelang anggonmu ngepèk Maria dadi bojomu, awit Putra kang kabobotaké iku marga saka Roh Suci, 21sarta Maria bakal mbabar putra kakung, iku namakna Yésus; awit iya iku kang bakal ngluwari umaté saka ing dosané." 22Iku mau kabèh kelakon supaya katetepan apa kang kapangandikakaké déning Pangéran lantaran nabi, mangkéné, 23"Lah, sang kenya bakal nggarbini sarta mbabar putra kakung, kang asmané bakal sinebut Imanuèl, tegesé: Allah nunggil kalawan kita." 24Satanginé turu, Yusuf banjur ngèstokaké kayadéné kang kadhawuhaké déning malaékating Pangéran, lan nampani Maria dadi bojoné, 25nanging ora diwori turu, nganti tumekané wus mbabar putra, kang banjur dinamakaké Yésus.
Jawa Suriname	Layang turunan 1Iki layang turunané mbah-mbahané Gusti Yésus Kristus. Gusti Yésus Kristus kuwi turunané ratu Daved lan ratu Daved turunané Bapa Abraham. 2Bapa Abraham kuwi bapaké Isak, Isak bapaké Yakub, Yakub bapaké Yudah sak seduluré. 3Yudah bapaké Pèrès lan Sérak, Tamar ibuné. Pèrès bapaké Kèsrom lan Kèsrom bapaké Aram. 4Aram bapaké Aminadab, Aminadab bapaké Nakson lan Nakson bapaké Salmon. 5Salmon bapaké Boas, Rahab ibuné. Boas bapaké Obèd, Rut ibuné. Obèd bapaké Isai lan Isai bapaké ratu Daved. Daved bapaké Soléman, ibuné tilasané Uriah. 6(1:5) 7Soléman bapaké Rekobéam, Rekobéam bapaké Abia, Abia bapaké Asa. 8Asa bapaké Yosafat, Yosafat bapaké Yoram, Yoram bapaké Usia. 9Usia bapaké Yotam, Yotam bapaké Akas lan Akas bapaké Hiskia. 10Hiskia bapaké Manasé, Manasé bapaké Amon, Amon bapaké Yosia. 11Yosia bapaké Yekonya sak seduluré. Ing waktu kuwi bangsa Israèl diboyong nang tanah Babilon. 12Nang tanah Babilon kono layang turunan kuwi terusané ngéné: Yekonya bapaké Séaltièl, Séaltièl bapaké Sérubabil. 13Sérubabil bapaké Abihud lan Abihud bapaké Eliakim. Eliakim bapaké Asur. 14Asur bapaké Sadok, Sadok bapaké Akim lan Akim bapaké Eliud. 15Eliud bapaké Eliasar, Eliasar bapaké Matan, Matan bapaké Yakub. 16Yakub bapaké Yosèf lan Yosèf kuwi bojoné Maria. Maria kuwi sing nglairké Gusti Yésus, sing diarani Kristus. 17Dadi ènèng turunan patbelas ping telu, yakuwi: Patbelas wiwit Abraham tekané Daved, patbelas wiwit Daved tekané beboyongan nang tanah Babilon lan patbelas wiwit beboyongan nang tanah Babilon tekané Kristus. Lairé Gusti Yésus 18Lairé Gusti Yésus Kristus kuwi lakuné ngéné: Maria, ibuné, wis patyangan karo Yosèf. Nanging sakdurungé kawin Maria wis meteng sangka Roh Sutyi. 19Lah jalaran Yosèf kuwi sakwijiné wong sing nglakoni kekarepané Gusti Allah, mulané dèkné ya ora gelem nggawé wirangé Maria nang tengahé wong okèh. Yosèf jawané arep meneng-menengan waé medot pepatyangané karo Maria. 20Nanging sak barengé nggagas-nggagas bab kuwi, dèkné éntuk impèn. Ing sakjeroné impèn kuwi mulékaté Gusti ngétok marang dèkné ngomong ngéné: “Yosèf, turunané ratu Daved, kowé aja wedi ngepèk Maria dadi bojomu, awit bayi sing digémbol kuwi tekané sangka Roh Sutyi. 21Maria bakal nglairké anak lanang sing kudu mbok jenengké Yésus, awit Dèkné bakal nylametké bangsané sangka dosané.” 22Kuwi mau kabèh marakké klakon sing wis diomong karo Gusti dèk mbiyèn liwat nabi Yésaya, sing uniné ngéné: “Enèng prawan bakal meteng lan nglairké anak lanang, sing bakal dijenengké Imanuèl, tegesé: Gusti Allah karo awaké déwé.” 23(1:22) 24Kadung tangi, Yosèf terus nuruti sing diomong karo mulékaté Gusti mau. Dèkné terus kawin karo Maria. 25Nanging Yosèf ora turu tyampur karo Maria nganti lairé anaké lanang. Kadung wis lair botyahé dijenengké Yésus karo Yosèf.

Ringkesan Isi Sarasilahe Gusti Yesus (Layang Turunan)

Layang Turunane Gusti Yesus isa dibagi dadi 3 bagian, zaman Abraham - Daud, zaman Dawud - Pambuwangan Babel, lan zaman Pambuwangan Babel - Yesus

Sarasilahe Yesus zaman Abraham - Dawud

1. Abraham peputra Iskak
2. Iskak peputra Yakub
3. Yakub peputra Yahuda
4. Yahuda peputra Peres
5. Peres peputra Hezron
6. Hezron peputra Ram
7. Ram peputra Aminadab
8. Aminadab peputra Nahason
9. Nahason peputa Salmon
10. Salmon peputra Boas
11. Boas peputra Obed
12. Obed peputra Isai
13. Isai peputra Dawud

Sarasilahe Yesus Zaman Dawud - Pambuwangan Babel

1. Dawud peputra Suleman
2. Suleman peputra Rehabeam
3. Rehabeam peputra Abia
4. Abia peputra Asa
5. Asa peputra Yosafat
6. Yosafat peputra Yoram
7. Yoram peputra Uzia
8. Uzia peputra Yotam
9. Yotam peputra Akhas
10. Akhas peputra Hizkia
11. Hizkia peputra Manasye
12. Manasye peputra Amon
13. Amon peputra Yosia
14. Yosia peputra Yekhonya

Sarasilahe Yesus Zaman Pambuwangan Babel - Yesus

1. Yekhonya peputra Sealtiel
2. Sealtiel peputra Zerubabel
3. Zerubabel peputra Abihud
4. Abihud peputra Elyakim,
5. Elyakim peputra Azor
6. Azor peputra Zadhok
7. Zadhok peputra Akhim
8. Akhim peputra Eliud
9. Eliud peputra Eleazar
10. Eleazar peputra Matan
11. Matan peputra Yakub
12. Yakub peputra Yusuf
13. Yusuf peputra Yesus

Ringkesan Miyose Yesus

Nalika Maryam lagi tunangan karo Yusuf, ternyata Maria ngandhut saka Roh Kudus. Pas Yusuf ngerti Maria ngandhut, Yusuf rencana cerai diem-diem. Pas Yusuf turu, ana malaikat mlebbu mimpi lan ngomong “He, Yusuf, tedhake Dawud, aja sumelang anggonmu ngepek Maryam dadi bojomu, awit Putra kang kabobotake iku marga saka Roh Suci, sarta Maryam bakal mbabar putra kakung, iku namakna Yesus; awit iya iku kang bakal ngluwari bangsane saka ing dosane.” Pas bangun, Maria diomah-omahi Yusuf, tapi ora kawin nganthi Yesus lair