'''Agama''', uga diarani '''gama''', iku tata utawa prinsip kapitayan kang manthep marang sang Gusti Pangéran, utawa uga diarani nganggo asma liyané kaya ta; [[Allah]], [[Déwa]], [[Sang Hyang Widi]], lan sabanjuré. Agama uga ajaran-ajaran kabaktèn lan kuwajiban-kuwajiban singkang ana gèndhèng-cènèngé karo kapitayan iku.
Tembung "agama" asalé saka basa [[Sansekerta]] singkang tegesé "tradhisi". Banjur tembung liyané iku [[religi]] singkang asalé saka basa [[Latin]] lan dhedhasar saka tembung verba "re-ligare". Iki tegesé "nalèni manèh". Karepé sawijining wong singkang nduwé agama iku nalèni awaké karo sang Pangéran.
Ning [[Tanah Jawa]] lan uga [[Indonésia]], ana limang agama singkang paling akèh penganuté, ya iku: agama [[Islam]], [[Kristen]] [[Protèstan]] lan [[Katulik]], [[Hindhu]], [[Ayyavali]], lan [[Buda]]. Nanging ing Tanah Jawa uga ora sithik singkang ngrasuk agama Jawa utawa lumrahé diarani [[Kajawèn]]. Agama iki lair saka pamikir asli wong jawa nanging uga ana pangaribawané saka prinsip-prinsip ajaran Hindhu lan Buda.
Kajaba iku wong-wong singkang katurunan Tionghoa ya akèh singkang ngrasuk ajaran Konghucu utawa [[Konfusianisme]]. Panganut agama [[Yahudi]] ing Tanah Jawa uga ana, sanadyan mung sithik cacahé. Semono uga ana wong-wong singkang ora percaya karo salah sijining agama babar pisan. Golongan singkang kaya mangkéné lumrahé diarani [[atheis]], nanging sajatiné durung mesthi atheis amarga ana wong singkang ora percaya agama nanging percaya karo Allah utawa Hyang Widi.
