Wikipédia:Artikel pilihan/2014 09
Revo Arka Giri Soekatno (asma peparab Revo utawa Revi; lair ing Ambon, 2 Agustus 1975; umur 49 taun) iku salah siji sing ngadegaké Wikipedia basa Indonésia (WBI). Revo ngentèkaké mangsa cilikané kanthi pindhah-pindhah panggonan miturut panempatan kerja wong tuwané. Kaloro wong tuwané asal saka Surakarta, Jawa Tengah. Revo uga dadi paneliti, wiraswastawan, lan panulis buku.
Jeneng Revo Arka Giri nduwèni makna, kaya sing dingandikakaké bapaké yèn Revo kuwi cekakan saka tembung révolusi, amarga dilairaké ing sasi Agustus, sawijining sasi révolusi tumraping bangsa Indonésia. Nanging tembung iki bisa uga mèmper karo tembung rêver jroning basa Prancis sing maknané "ngimpi". Tembung Arka asal saka basa Sangskerta sing tegesé "geni" utawa "(panas) srengéngé". Déné Giri, sing uga asal saka basa Sangskerta, maknané "gunung". Dadi sacara wutuh, sang bapa ngarepaké, muga-muga Revo Arka Giri nduwèni impèn sing dhuwuré kaya srengéngé. sagedhé gunung lan terus murup kaya geni sing ora naté mati. Anyar iki Revo pinuju nyiapaké buku asesirah: Surat-surat Melayu mawa aksara Jawa sing digadhang bakal énggal kababar.