Anemoi

Anemoi (Grikenlan: Ἄνεμοι) punika para déwa angin wonten ing mitologi Yunani ingkang dados lambang mata angin lan dipunasosiasiaken kaliyan manéka mangsa sarta kawontenan cuaca. Déwa-déwa mau asring dipungambaraken minangka angin utawi priyantun kakung ingkang gadhah swiwi utawi minangka turangga ing kandhang déwa Aiolos. Tiyang sepuhipun inggih punika Astraios lan Eos.

Menara Angin ing Athena, ukiranipun nggambaraken Boreas (kiwa) lan Skiron (tengen).

Anggota Anemoi inggih punika Boreas, déwa angin lèr lan ingkang mbeta mangsa adhem ; Notos, déwa angin kidul lan sesambetan kaliyan pungkasan mangsa panas ugi wiwitan mangsa palastra ; Zerifos, déwa angin kilèn lan ingkang mbeta mangsa semi ; lan Euros déwa angin wétan lan wonten gegayutanipun kaliyan mangsa palastra. Ing antawisipun Anemoi, Euros punika satunggaling ingkang boten kasebutaken wonten ing Theogonia lan Himne Orfeus. Kajawi sekawan déwa utami punika, Anemoi ugi kapérang dados manéka déwa angin sanèsipun ingkang nglambangaken angin "barat laut", "timur laut", "tenggara", lan "barat daya". Wonten ing mitologi Romawi, Anemoi kawéntar minangka Venti.

Boreas

Fragmen Buda-Yunani ingkang nggambaraken déwa angin Boreas, kapanggihaken wonten ing Hadda, Afghanistan

Oreithyia dipunculik déning Boreas. Lukisan vas dai nalika taun 350 SM.

Boreas (Grikenlan: Βορέας, Boréas) punika déwa angin lèr lan ingkang mbeta mangsa adhem. Boreas dipungambaraken minangka priyantun kakung ingkang gadhah janggut lan swiwi sarta ngginakaken jubah. Pausanias nyebat bilih Boreas gadhah sukuula sanajan wonten ing seni kuna sukunipun Boreas dipungambaraken minangka sukunipun manungsa.

Boreas kaubungaken kaliyan turangga lan ugi naté éwah dados turangga lanang lan metengi kathah turangga wadon dumugi Boreas dados bapak saking kalih welas turangga. Turangga ingkang putra saged lumayu ing sabin tanpa midak tuwuhan ing sabin mau. Ing versi sanèsipun, Boreas metengi turangga wadon tanpa éwah dados turangga lanang . Tiyang Yunani kuna pitados bilih Boreas mapan wonten ing Trakia.

Notos

Patung Notos ing Astana Empat Angin wonten ing Warsawa.

Notos (Grikenlan: Νότος, Nótos) punika déwa angin kidul ingkang dipunasosiasiaken kaliha angin panas lan mangsa panas. Kajawi punika ugi dipunpitadosi ingkang mbeta badai nalika pungkasan mangsa panas lan mangsa palastra. Notos dipunajrihi awit dados ingkang ngrisak panen. Wonten ing mitologi Romawi, Notos kawentar mianngka Auster, wujuding angin sirocco ingkang mbeta mega kandhel lan kabut.

Euros

Euros (Grikenlan: Εύρος, Eúros) punika déwa angin wétan. Euros dipunasosiasiaken kaliyan mangsa palastra (mangsa palastra) lan jawah. Simbolipun punika vas ingkang kuwalik minangka lambang guyuran toya. Euros mapan wonten ing wétan, caket kaliyan astana Helios.

Zefiros

Zefiros, utawi Zefir (Grikenlan: Ζέφυρος, Zéphuros) punika déwa angin kilèn. Zerifos dipunasosiasiaken kaliyan mangsa semi lan ugi dipunpitadosi mapan wonten gua ing Trakia.