Hamzah Sulaeman

Hamzah Sulaéman ya iku pengusaha, seniman, lan perancang busana sing manggon ana ing Ngayogyakarta. Hamzah Sulaéman iku generasi kaloro kulawarga Grup Mirota kang nduwé punjeré oleh-oleh, Hamzah Bathik, papan mangan, lan sanggar tari. Hamzah tunggalé papat ya iku Yangky Iswanti, Siswanto, Ninik Wijayanti, lan Aryanti. Hamzah kuliah ana ing Universitas Gadjah Mada jurusan Biologi ananging ora nganti rampung banjur kuliah ing Universitas Sanata Dharma njupuk jurusan basa Inggris. Sawisé lulus saka Sanata Dharma, Hamzah nyambut gawé ing Amérikah Sarékat dadi juru ladi kapal pesiar. Sabaliné saka Amérika, Hamzah banjur ngembangaké usaha wongtuwané.

Hamzah  uga seniman kang seneng akting lan tari, dhèwèké uga diceluk Raminten amarga lakoné dadi wong wédok Jawa tuwa ana ing kethoprak dhagelan “Péngkolan”. Raminten banjur dianggo mènèhi jeneng papan mangan The House of Raminten lan The Waroeng of Raminten.

The House of Raminten

The House of Raminten ya iku omahé Hamzah Sulaéman kang digawé warung jamu amarga Hamzah kepingin mbudidaya jamu ing kalangan bocah enom. Mula Hamzah mbangun kafé kang nduwé kahanan kang tradhisional lan ngangkat konsèp angkringan mligi Ngayogyakarta. Menu baku kang ditawaraké ya iku sega kucing, sega liwet lan sega ijo.

The Waroeng of Raminten

The Waroeng of Raminten ya iku papan mangan kang diyasa ing 26 Dhésémber 2008, nduwé konsèp rèstoran kang mewah, unik lan antik. Warung iki nduwé cabang ing Jl. FM Noto No.7 Kota Baru, Mirota Batik lantai 3 Jl.A Yani (Malioboro) lan Jl.Kaliurang KM 15,5. Kabèh cabang ana ing Ngayogyakarta. Nalika lumebu rèstoran, disuguhaké tembang Jawa lan pajangan-pajangan khas Jawa.

Hamzah Sulaéman nduwé tékad nglestarikaké budaya Jawa kang wiwit saka ngenalaké jamu lan ngangkat angkringan. Budaya Jawa kang kenthel bisa dideleng saka para pamong migunakaké busana abdi dalem kraton. Pamong wédok migunakaké kemben khas Jawa. Hamzah uga ora kepingin mbukak papan mangan kang padha ing kutha liyané. Amarga visi utama papan mangan iki ya iku kanggo narik wisatawan teka nèng Ngayogyakarta. Supaya kanggo ningkataké pariwisata Ngayogyakarta. The House of Raminten uga dadi toko souvenir lan olèh-olèh khas Ngayogyakarta.