Masjid Katangka

Masjid Al-Hilal utawi ingkang langkung misuwur kanthi sebatan Masjid Katangka inggih punika kalabet salah satunggaling masjid ingkang tuwa dhéwé wonten ing provinsi Sulawesi Selatan, Indonésia. Dipunsebat Masjid Katangka amargi masjid punika madeg wonten ing kalurahan Katangka, kacamatan Somba Opu, Kabupatèn Gowa. Kajawi punika, dipunsebat masjid Katangka amargi bahan baku dhasar kanggé damel masjid punika ugi dipunpitados saking wit Katangka.

Masjid Katangka

Wangunan Wigati

Masjid Al-Hilal punika inggih ugi minangka salah satunggaling tilaran sujarah pangrembakaning agami Islam ing Sulawesi Selatan, mliginipun ing wewengkon Kesultanan Gowa. Masjid Katangka ingkang umuripun sampun langkung saking sekawan abad punika taksih kukuh madeg ing papanipun. Masjid Al Hilal ingkang mapan ing Jl Syeh Yusuf, Katangka punika tebihipun kiran langkung 10 km wonten ing sisih kidul punjering kitha Makassar (Lapangan Karebosi). Masjid Al Hilal punika ambanipun kirang langkung 174,24 mèter persegi. Nalika ing zamanipun, masjid Al Hilal ingkang minangka masjid tetandha wontenipun wekdal énggal punika kalebet masjid ingkang ageng, mewah, saha dipunanggep wigati amargi konstruksi bangunanipun dipundamel saking batu bata. Ing jaman rumiyin, namung yasan-yasan ingkang wigati ingkang dipunbangung saking batu bata, kados ta pura saha bètèng. Pigunan ingkang wigati saking masjid punika inggih kanggé papan sarana ngibadah. Ing saben wekdal salat, masjid Katangka punika rame dipunkebaki déning jamaah ingkang badhé salat. Kajawi punika, ing pelataran masjid pérangan wingking ugi wonten makam-makam para pemuka agama saha kerabat ingkang damel masjid. Khusus kagge makam para pandamel masjid dipunparingi atap ing nginggilipun kanthi wujud kubah.

Arsitekturipun

Salah satunggaling ciri khas saking masjid Katangka punika inggih saking tembokipun ingkang minangka tandha yasan kina. Tembokipun dipundamel saking batu bata ingkang radi kandel ngantos kandelipun 120 centimeter. Déné arsitkturipun inggih minangka paduan kalih unsur kabudayan kanthi nuansa Jawa saha Cina. Struktur atapipun masjid kados yasan joglo, ugi gadhah sekawan tiyang penyangga ingkang dipunsebat soko guru, nanging sekawan soko kasebat boten dipundamel saking kayu nanging saking tumpukan watu. Payon pérangan nginggil wujudipun segi tiga piramida anthi bahan saking gendheng. Masjid punika ugi gadhah serambi kados déné masjid ing tanah Jawi. Pangaribawa kabudayan Cina katingal saking atap mimbar ingkang wujudipun atap kados klentheng. Ing skitering mimbar ugi taksih wonten kramik saking Cina.