Mattur
Mattur (utawa Mathur) iku désa ing dhistrik Shimoga ing praja Karnataka, Indhiya, sing kondhang jalaran wargané ngendikan basa Sangsekerta saben dinané, sanadyan basa umum sing dianggo ing praja iku basa Kannada.[1][2] Ing désa Mattur ana candhi Rama, Siwalaya, candhi Somèswara, lan candhi Laksmikèsawa.
| Mattur ಮತ್ತೂರು Mathur, Matthur, Mathoor | |
|---|---|
| désa | |
 Kali Tunga ing Mattur | |
| Peparab: Désa Sangsekerta | |
| Nagara |  India |
| Praja | Karnataka |
| Dhistrik | Dhistrik Shimoga |
| Basa | |
| • Resmi | Kannada |
| Zona wektu | IST (UTC+5:30) |
| Kutha candhaké | Shivamogga |
Désa kembaré Mattur, ya iku Hosahalli, mèh samubarangé sairib karo désa Mattur. Saka Mattur, désa Hosahalli kapernah ing sabrangé Kali Tunga. Désa loro iki asring ingaran-sebut barengan kaya déné sakloron.[3] Mattur lan Hosahalli kondhang awit pangudiné njurung kaprigelan Gamaka. Gamaka iku rupa seni awujud nembang lan nyarita sing mirunggan ing Karnataka. Désa-désa iki loro saka saimit désa ing Indhiya sing isih nganggo basa Sangsekerta minangka basa enggon-enggonan.[4]
Dhémografi
besutSapérangan gedhé warga désa Mattur iku wong Sankèthi, ya iku golongan Brahmana kuna, sing sangka Kerala neneka ing Mattur 600 taun kapungkur. Golongan iki ngendikan basa Sangsekerta saha ngendikan dhialèk langka sing ingaran Sankèthi. Dhialèk iku ingaran carubaning basa Sangsekerta, Tamil, Kannada, lan Telugu sing tanpa aksara lan ditulis sarana aksara Déwanagari.[5] Saliyané iku, uga ana wong Tamil sing nekani praja Karnataka maabad-abad kapungkur. Akèh-akèhé wong Tamil minangka narakarya.[6]
Panguri-uri basa Sangsekerta
besutNganti taun 1980-an, warga Mattur isih ngendikan basa saenggon, ya iku basa Kannada uga basa Tamil. Basa Kannada minangka basa umum praja kono, déné basa Tamil dicaturaké para narakarya saka praja Tamil Nadu.
Nalika taun 1981, Sanskrita Bharati, sawijining organisasi sing ngenalaké basa kuna, ngadani lokakarya basa Sangsekerta suwéné sepuluh dina ing désa iki.[5] Kala samana ana obahan nedya memetri basa Sangsekerta. Basa iki dadi wancahan awit mung mirunggan kanggo golongan Brahmana lan sakala kagenti déning basa Kannada. Pandhita saka Pejawar Mutt (sasana agama) ing Udupi uga ngèstrèni lokakarya iki lan paring pamrayoga supaya Mattur dadi désa abasa Sangsekerta. Sajeroning sepuluh dina lokakarya, sakèhing warga désa kudu ngendikan cara Sangsekerta suwéné rong jam saben dinané.[6]
Tekan sapréné, basa Sangsekerta ora mung digunemaké golongan Brahmana Sankèthi manèh, nanging uga dianggo golongan masarakat liya[6], dalah dadi basa baku ing désa iki.[5] Ing pamulangan Sri Sharada Vilasa saenggon, ana 150 saka 400 siswa sing nyinaoni basa Sangsekerta minangka basa kapisan, lan basa Inggris minangka basa kapindho, dalah basa Kannada utawa Tamil utawa basa enggon-enggonan liya minangka basa katelu.[6] Désa iki uga nglairaké 30 profésor basa Sangsekerta sing mulang ing universitas-universitas Kuvempu, Bengaluru, Mysore, lan Mangalore.[5]
Rujukan
besut- ↑ Omkar Nath Koul, L. Devaki, Central Institute of Indian Languages, Unesco (2000). Linguistic heritage of India and Asia. Central Institute of Indian Languages. kc. 247.
{{cite book}}: CS1 maint: multiple names: authors list (link) - ↑ Arvind Sharma (2005). New focus on Hindhu studies. D.K. Printworld (P) Ltd.,. kc. 65.
{{cite book}}: CS1 maint: extra punctuation (link) - ↑ Rao, Subha J (2 March 2008). "Keeping Sanskrit alive". The Hindu. Diarsip saka sing asli ing 16 October 2010. Dibukak ing 1 April 2011.
- ↑ "Sanskrit village set to glow anew-Times of India". Dibukak ing 25 November 2016.
- ↑ a b c d Pal, Sanchari (17 August 2008). "This Tiny Sanskrit Speaking Village in Karnataka Has at Least One IT Engineer in Every Family!". The Better India. Dibukak ing 26 November 2016.
- ↑ a b c d "Indian village where people speak in Sanskrit". BBC. 22 December 2014. Dibukak ing 26 November 2016.