Musiyum Fatahillah

Museum ing Jakarta Kulon, Indonesia

Musiyum Fatahillah uga dikenal minangka Musiyum Sajarah Jakarta utawa Musiyum Batavia iku musiyum kang ana ing Dalan Taman Fatahillah No. 2, Jakarta Kulon kanthi wiyar punjul 1.300 mèter pasagi.

Musiyum Fatahillah

Sajarah besut

 
Plang Pèngetan Pambangunan Musiyum Fatahillah kang biyèné Balai Kutha

Gedhung iki biyèn dijenengi Stadhuis utawa Balai Kutha, kang dibangun taun 1707-1710 dhedhasar mandhat saka Gubernur Jendral Johan Van Hoorn. Gedhung dibangun wiwit tanggal 25 Januari 1707 lan diresmèkaké tanggal 10 Juli 1710. Wangunan balaikutha itu dirancang déning W.J.van der Velde mèh padha karo Pura Dam ing Amsterdam. Gedhung iki kapérang saka yasan utama, yasan sanding kang dipigunaaké minangka kantor, ruwang pengadilan, lan ruwang-ruwang ngisor lemah kang dipigunaaké minangka pakunjaran.

Awalé, gedhong iki dipigunaaké kanggo kantor Gubernur Jendral, kantor Rood Van Justine, kantor College van Schepener;Weskammer, Balaikutha lan Déwan Urusan Kawin. Ing taun 1925 gedhong iki dadi kantor Gubernur Jawa Kulon tekan taun 1942. Déning Jepang ing taun 1942 gedhong iki dipigunaaké minangka markas militèr. Wulan Agustus – Dhésèmber 1945 dipigunaaké minangka Kantor Gubernur Jawa Kulon. Sawisé iku dipigunaaké minangka kantor Komando Militer Kutha (KMK) I banjur dadi Komando Distrik Militèr (KODIM) 0503 tekan taun 1972.

Wiwit taun 1972, Pamaréntah DKI Jakarta mugar gedhong iki lan didadèkaké minangka Gedhung Musiyum Sajarah Jakarta. Tanggal 7 Maret 1974, gedhong iki diresmèkaké minangka Musiyum Fatahillah déning Gubernur Ali Sadikin.

Arsitèktural besut

 
Panunjuk arah mata angin ing payon musiyum

Bangunané telung tingkat kanthi arsitèktur gaya Barok klasik abad kaping 17, cèté kuning lemah, kusèn lawang lan jendhela saka kayu jati warna ijo tuwa. Pérangan payon utama ana panunjuk arah mata anginé.

Musiyum iki ambané punjul 13.000 mèter pasagi. Pekarangané mawa susunan konblok, ana blumbangé siji lan sapérangan wit kang wis tuwa.

Kolèksi Musiyum besut

 
Salah siji kolèksi mériam ing Musiyum Fatahillah

Obyèk-obyèk kang ing musiyum iki antarané tapak tilas sajarah Jakarta, réplika paninggalan mangsa Tarumanagara lan Pajajaran, asil pangedhukan arkéologi ing Jakarta, mèbel antik saka abad kaping 17 tekan 19, kang wujud gabungan saka gaya Éropah, Tiongkok, lan Indonésia. Uga ana keramik, gerabah, lan watu prasasti. Kolèksi-kolèksi iki ana ing manéka ruwang, kaya ta Ruang Prasajarah Jakarta, Ruang Tarumanagara, Ruang Jayakarta, Ruang Fatahillah, Ruang Sultan Agung, lan Ruang MH Thamrin.

Ana uga sapérangan kolèksi kabudayan Betawi, numismatik, lan bécak. Malah saiki uga ana patung Déwa Hermes(miturut mitologi Yunani, wujud déwa kaberuntungan lan pangreksa kaum pedagang) kang mauné ana ing prapatan Harmoni lan mériam Si Jagur kang dianggep duwé kakuwatan magis. Saliyané iku, ing Musiyum Fatahillah uga ana tila pakunjaran ngisor lemah kang biyèn tau dipigunakaké ing jaman panjajahan Walanda.

Pranala njaba besut