Netti Darlina

Nètti Darlina inggih punika salah sawijining bidan mawi sagudhang préstasi pelopor program "Simbah Trésna Putu" ugi program "ASI Éksklusif" dhumateng paguyuban-paguyuban posyandhu ing désanipun. Panjenenganipun miyos ing Pariaman, 14 Oktober 1980. Panjenenganipun sampun kagungan kulawarga, kenggarwa asmanipun Teguh Widodo. Kaparingan yoga cacah sekawan antawisipun Nayla, Nadhif, Naufal, twin Nazmi. Sabendinané makarya dados bidan ugi ibu rumah tangga. Nadyan seprana sepréné dèrèng dipunangkat dados PNS utawi pegawé negri sipil panjenegané boten nggersula. kuwajibanipun minangka bidan boten kendhat wonten ing mriku kémawon. Semangat ingkang tuwuh ing sajroning badanipun dipunjalari saking kapribadhèn ugi motivasi dhiri ingkang ageng. Riwayat panggulawenthahing ngèlmu ugi urun daya saperlu ndidik Nètti dumugi kahanan sapréné punika. Papan nggegulang ngèlmu kajelasaken wonten ing ngandhap punika.

Posyandhu minangka salah satunggaling program Nètti saperlu nepangaken punapa kémawon mupangating "ASI Éksklusif" tumrap bayi ingkang nembé kémawon lahir wiwit nul wulan dumugi nem wulan. Program punika ingkang dadosaken Nètti Darlina terkenal utawi kawentar préstasinipun ing Indonesia punika. Program "ASI Éksklusif" ugi dipunjangkepi kaliyan program "Nenek Sayang Cucu" atau "Simbah Tresna Putu" kanthi dasar simbah-simbah ing Indonesia taksih kagungan peran ingkang penting saperlu momong ugi ndèrèk ngagengaken wayahipun.

Pamulangan

Riwayat pamulangan ingkang dadosaken Nètti Darlina suksès kados sakpunika antawisipun ing:

1. SDN 04 Pekanbaru tahun 1992.
2. SMPN 8 Pekanbaru tahun 1996.
3. SPK Pariaman tahunn 1999.
4. Akademi Kebidanan Pekanbaru tahun 2004.
5. SKM tahun 2015.

"ASI Éksklusif" liwat program "Simbah Tresna Putu" ugi mupangatipun kagem bayi. Ing sajeroning posyandhu-posyandhu Nètti nindakaken budi ingkang luhur punika, atur punapa kémawon gizi ingkang dipunkandhung kalian susu ibu ingkang boten wonten ing sajeroning susu formula utawi damelan pabrik.

Pakulinan sabendinten

Saben dinten Nètti makarya minangka bidan wonten ing griyanipun piyambak, amargi dèrèng dipunangkat minangka pegawé negri sipil utawi PNS. Nadyan yuswanipun sampun kémawon mèh mancik (kepala) sekawan dasa tahun, sakpunika ing yuswa 39 tahun panjenenganipun taksih semangat tuwin aktif ing sajeroning bidang keséhatan mliginipun program (Nènèk Asik Tresna Putu). Program punika minangka salah satunggaling program ingkang mangke saged dados margi anggenipun ngukir préstasi. Nètti minangka pelopor arsa ngajak dhumateng ibu-ibu ingkang ngandhut saha para mbah-mbah ingkang mangké badhé momong wayahipun. Program punika kalaksanan kanthi dipunbentuk paguyuban-paguyuban ibu-ibu ngandhut. Paguyuban punika dipunwastani paguyuban ASI Ekslusif ingkang sampun maksimal ugi dados patuladhan tumrap ibu-ibu inggih punika paguyuban ing Posyandhu Kenanga, posyandu ingkang manggèn ing palataran griyanipun Nètti. Sayektosipun program punika dipuntepangaken kaliyan Nètti amargi ASI Eksklusif sanget dipunbetahaken kaliyan bayi supados séhat tuwin kebal saking serangan panyakit.

Menawi wonten posyandhu ing griyanipun piyambak, Nètti asring paring panyuluhan ngenani pentingipun tuwin prayoganipun ASI Eksklusif ibu dhumateng yoganipun. Wonten paguyuban posyandhu ASI Ekslusif punika boten namung ibu-ibu ingkang rawuh, simbah-simbah ugi kathah ingkang rawuh saperlu ndèrèk ajar ngenani ASI Ekslusif. Panyuluhan utawi sosialisasi kajaba dipun gelar wonten ing griyanipun piyambak, ugi dipun wedhar ing kantor kelurahan kaya ta ing kantor Kelurahan Bagan Besar, Kecamatan Bukit Kapur, Kota Dumai, Riau punika. Nètti medhar prayoganipun ibu maringi asi ingkang pisanan dhumateng yoganipun dumugi enem wulan tanpa dipuntambah kaliyan dhaharan utawi suplemen sanèsipun. Ing sosialisasi punika kathah simbah-simbah ugi sapérangan ibu-ibu ingkang dèrèng yakin menawa namung ASI Eksklusif kémawon punika saged jagi kesehatan utawi kondisi bayinipun.

Tanggapan-tanggapan medal ing sajeroning sosialisasi punika. Wonten ingkang ngugemi pamikiripun bilih gedhang saged dadosaken bayi wareg saéngga tilemipun saged angler. Wonten malih simbah ingkang ngèyel menawi panjenenganipun punika sajaripun kagungan pengalaman ingkang langkung kathah tinimbang bidan Nètti. Midhangetaken tanggapan ugi pamikiran ingkang warni-warni punika, Nètti boten lajeng cunthel ing tujuanipun, nanging sansaya tambah semangat ugi cerdas paring jawaban ingkang saged paring kamareman dhumateng simbah-simbah ugi sapérangan ibu. Panjenganipun boten lajeng duka punapa déné mutung, kanthi raos sabar twin boten kendhat-kendhatipun praktèk langsung saperlu nuduhaken kados pundi ta paring ASI Eklsklusif punika saged mupangati sanget dhumateng bayi.

"Simbah Tresna Putu" nedahaken bilih simbah punika taksih kagungan peran ugi (jasa) tumraping yoga saha wayahipun, amargi menawi kenibu utawi bapak saking bayi punika boten wonten ingkang ndèrèk momong bayi punika inggih simbahipun. Liwat program punika simbah dipunsuwun mangretosi punapa pentingipun Asi nem wulan kapisan punika.

Program "Simbah Tresna Putu"

Nama punika dipunpilih kalian Nètti amargi nama "Simbah" ing sajeroning tanah Jawa taksih kathah jasanipun dumateng kaluwarga yoga-yoganipun. Ing Jawa piyambak menawi ibu ingkang ngandhut lajeng babaran samangké bayi punika dipunmong kalian ibu ugi simbah. Simbah ing Jawa saèstu remen sanget menawi dipun paringi rezeki saking Gusti wewujud wayah. Simbah kakung punapa déné putri uga ndrèrèk momong wayahipun ngantos ageng, kinten-kinten sampun sekolah dhasar. Ingkang dados dredah sajeroning kulawarga ingkang taksih wonten simbahipun salah sawijining dredah punika jalaran saking simbah ingkang dèrèng mangertos sanget tumrap mupangating ASI Eksklusif ibu tumrap bayinipun. Pangertosan simbah ngenani Asi Eksklusif bènten-bènten saben tiyangipun, kadhang sampun wonten simbah ingkang mudheng ananging inggih wonten simbah ingkang dèreng mangertosi. Punapa ta sejatining ASI Eksklusif punika? ASI Eksklusif inggih punika banyu susu ibu ingkang kedah dipun paringaken dhumateng yoganipun ingkang nembé lair dumugi nem wulan, tanpa dipunsukani dhaharan tambahan sanèsipun nadyanta punika susu formula punapa déné susu-susu ingkang bermerk. i

Préstasi ugi pangaji

Papan gegulang ngèlmu punika nyithak siswa-siswa ingkang unggul ugi mawa préstasi ingkang gemilang. Salah sawijinipun Nètti Darlina (alumni) Akademi Kebidanan ugi SKM ingkang dados bidan berprestasi ing tingkat punapa kémawon. Kathah piaji (penghargaan) ing bidang kesehatan ingkang ginayuh déning Nètti Darlina. Préstasi-préstasi kala wau antawisipun:

• Bidan Teladhan 1 Dumai tahun 2010.
• Bidan Teladhan 2 Riau tahun 2010.
• Juara kemitraan Dukun, Dumai tahun 2010.
• Juara 1 Poster Kesehatan Nasional tahun 2017.
• Posyandhu ingkang saé piyambak ing Riau tahun 2018.
• Posyandhu ingkang saé piyambak ing tingkat nasional tahun 2018.

Préstasi-préstasi kala wau dipun gayuh kaliyan Nètti sarana program ASI Ekslusif ingkang dipun wedhar utawi tepangaken dhumateng para ibu-ibu rumah tangga ugi ngantos simbah-simbah.

Nètti natos dipundémo amargi kathah tiyang-tiyang ing kelurahanipun boten trima amargi wonten laré ingkang kejang-kejang sabibaripun dipunimunisasi (dipunvaksin), sedaya kaa wau amargi dèrèng wonten pemahaman saking para tiyang sepuh saking laré-laré punika.

Dredah sajeroning ngayuh préstasi

Sajeroning nindakaké pakaryan ugi program ASI Èksklusif punika Nètti asring manggihi dredah babagan program ingkang boten dipunsarujuki kaliyan para-para ingkang boten remen utawi sreg dhumateng program ASI Èksklusfif ingkang dipunpelopori kaliyan bidan non-PNS punika. Salah sawijining wujud boten sarujukipun sapérangan warga masyarakat dhumateng program punika kanthi dipungelar aksi unjuk rasa utawi démo.

Jalaran sanès ingkang ugi jalari aksi démo inggih punika wonten salah sawijining laré ingkang kejang-kejang sabibaripun dipun vaksin kalian Nètti minangka bidan désa. Démo punika minangka pengalaman Nètti ingkang boten dinyana-nyana, prastawa punika dumadi nalika tahun 2007 ing salah sawijining kampung. Sayektosipun prastawa punika boten luputing Nètti, amargi kanthi nyukani vaksin punika panjenenganipun boten kesupen ugi paring dhawuh dhumateng ibu-ibu ingkang kagungan yoga bilih mangké menawi sampun dugi griyanipun piyambak-piyambak, laré punika kersanipun kèndel sawatawis supaya vaksin ingkang mlebet ing badanipun saged rumasuk kanthi sekéca. Déné mangké (efek samping) saking vaksin punika inggih raos panas utawi demam. Nètti ugi paring obat demam kanthi tujuan saged ngandhapaken demam saking vaksin kala wau, ananging ibu-ibu kesupen boten maringaken obat punika dhumateng yoga-yoganipun saéngga panas langkung nginggil dadosaken kejang-kejang. Kala wau aturing Nètti dhumateng ibu-ibu ing kampung punika.

Masalah sanèsipun ugi tumanduk dhumateng Nètti. Taksih ing tahun 2007, panjenenganipun saestu nduwèni gegayuhan saged dipunangkat minangka pegawé negri utawi PNS. Sampun 11 tahun anggenipun ngabdi ing Kelurahan Bagan Besar, ing pengumuman PNS penjenenganipun boten wonten alias boten ketampi. Sedhih ing manahipun awit sampun dangu dados bidan (honorèr) boten dipun angkat-angkat. Dipuntambah malih ing tahun punika inggih minangka tahun ingkang pungkasan Nètti saged ndèrèk daftar PNS amargi yuswanipun sapunika sampun 39 tahun sampun ngluwihi wates katentuanipun utawi (prasyarat) bakal calon PNS inggih punika 35 tahun.

Tanggapan kader program "Asi Éksklusif"

Tanggapan punika mijil saking salah setunggaling kader Nètti ing paguyuban posyandu ing griyanipun. Kader-kader Asi Éksklusif punika wonten 40 ingkang sedayanipun ibu-ibu. Tanggapan positif ingkang sepisan inggih punika saking Érnawati ingkang kagungan putra wawah sekawan ananging namung kalih ingkang dipunsukani ASI Éksklusif punika. Panjenenganipun boten sumerep punapa sayektosipun mupangat saking ASI punika dados yoga ingkang kalih dèrèng narima mupangat saking ASI Éksklusif ibu. Érnawati ngendika bilih yoganipun ingkang kalih punika langkung séhat ugi langkung (kebal) utawi tahan dhumateng manéka warna lelara sabibaripun dipunsukani ASI Éksklusif punika.

Tanggapan ingkang kaping kalih saking simbah-simbah inggih punika Mbah Sariyah (67) tahun. Panjenenganipun ugi ndèrèk remen wontenipun program ASI Éksklusif punika, alasanipun amargi putu-putu Mbah Sariyah katingal langkung séhat ugi aktif tinimbang laré-laré ingkang boten kena ing ASI Ékslusif punika.