Sagon

Sagon inggih punika salah satunggaling tetedhan tradhisional khas Jawa Tengah. Ing wekdal rumiyin, kathah tiyang ingkang remen damel sagon kanthi bahan-bahan ingkang prasaja tanpa bahan pengawèt. Nanging ing wekdal sapunika anggènipun damel sagon sampun asring dipunsukani bahan pengawèt ngengingi produk ingkang dipunsadé. Ing wekdal rumiyin, anggènipun damel sagon, tiyang ngginakaken anglo dados asilipun kue sagon ingkang dipundamel ugi eco. Napa malih anggènipun mbakar taksih ngginakaken areng minangka bahan bakaripun. Nanging ing wekdal sapunika, ngengingi kabetahan pasar ingkang langkung kathah, anggènipun damel sagon sampun kathah ingkang boten ngginakaken anglo nanging ngginakaken kompor biyasa kemawon.

sagon bakar

Bahan-bahanipun

Bahan-bahan ingkang dipun-ginakaken kanggé damel sagon inggih punika kados makaten:

• 350 gram klapa parut
• 500 gram glepung sagu
• 150 gram mentega
• 250 gram gendhis pasir
• 1 kuning tigan
• 1/2 cendhok teh panili
• 1/2 cendhok teh uyah

Caranipun damel

Manawi badhé damel sagon punika boten patos angèl. Ing ngandhap punika badhé dipunandharaken kados pundi caranipun damel sagon.

1. Mentega dipunmixer ngantos warninipun pucet. Lajeng manawi sampun pucet, kuning tigan saged dipunlebetaken, kanthi terus dipunmixer, lajeng saged dipunsisihaken rumiyin.
2. Ing wadhah sanèsipun, sadaya bahan ingkang wonten kejawi glepung saged dipunlebetaken lajeng dipungiles, dipunremes-remes ngantos gulanipun ajer. Manawi sampun ajer gendhisipun nembé glepung saged dipunlebetaken, lan dipuncampur dados satunggal ngantos rata.
3. Salajengipun, mentega saha tigan ingkang sampun dipunkocok kala wau saged dipunlebetaken, lan dipunudhak ngantos rata sadaya.
4. Oven dipunpanasi kanthi suhu 160 drajat celcius. Adonan ingkang sampun dipundamel kala wau lajeng saged dipuncithaki wonten ing loyang punapa cithakan ingkang sampun dipunsamektakaken. Sampun ngantos kesupen, sadèrèngipun dipun-ginakaken kanggé manggang, loyang utawi cithakanipun dipunlumuri mentega rumiyin kandelipun kirang langkung 4 mm supados samangke adonanipun boten nemplek ing cithakanipun.
5. Manawi adonan sampun dipuncithak ing loyang, lajeng loyangipun saged dipunlebetaken wonten ing oven lan dipunpanggang ngantos mateng saha warninipun radi coklat. Manawi sampun mateng, adonan saged dipunangkat lan dipungurat malih nganggé peso supados wonten teksturipun lan gampil dipuncopot saking cithakanipun.