Grana Padano

Grana Padano inggih punika kèju mawi tekstur atos saking susu sapi ingkang dipunpasteurisasi ingkang asalipun saking Italia. Tirunan saking kèju punika ingkang langkung kondhang ing Amèrika Lor lan Inggris dipunmangertosi kanthi nama parmesan.^[1]^[2] Pérangan njero kèju punika mawi warna kuning pucet lan mawi tèkstur atos uga kasar.^[1] Grana Padano dipunproduksi ing laladan sakiwa-tengené Kali Po, Venice, Trentino, Piemont, Lombardy, lan Emilia-Romana.

Sajarah

Asal mula saking kèju Grana Padano punika saking jaman tengahan.^[3] Kala punika ing laladan padésan sakiwa-tengené Kali Po wonten prastawa kengelihan lan para biarawan ing laladan mau pados cara kanggé nyimpen susu langkung ingkang boten dipununjuk ing dinten punika.^[3] Satunggaling cara punika kanthi damel dados kèju nanging sanès kèju seger ingkang limrahipun dipundamel ing kala punika.^[3] Lajeng dipundamel kèju atos ingkang saged dipunsimpen pinten-pinten wulan ugi pinten-pinten taun.^[3] Ingkang manggihaken kèju punika satunggaling biarawan saking Chiaravalle celak kaliyan Milan nalika taun 1135 ingkang lajeng dipuntiru déning biarawan sanèsipun.^[3] Para biarawan nyebat caseus vetus, Basa Latin kanggé "kèju tuwa".^[3] Nanging tiyang-tiyang maringi nama sanès kanggé kèju mau miturut tèksturipun ingkang kados butiran-butiran ("grana").^[3] Lajeng wonten nama formaggio di grana ingkang dipunbedakaken dhedhasar provinsi ingkang damel.^[3] Ing Parma keju punika kondhang minangka Parmigiano-Reggiano.^[3]

Wujud lan tèkstur

Grana Padano punika awujud silinder lan radi cembung. Keju punika mawi diamèter 14 dumugi 18 inci, kanthi dhuwur 7 dumugi 10 inci lan bobotipun warna-warna saking 53 dumugi 88 pon. Kulitipun mawi warna kuning alami lan kandhelipun antawisipun 4 dumugi 8 mm.

Prosès anggènipun damel

Panyimpenan keju Grana Padano wonten satunggaling pabrik ing Italia.

Kèju punika dipunproduksi saking susu sapi ingkang dipunparingi pakan damen. Susu mau kalebet campuran saking susu ingkang dipunperes nalika wayah énjing lan wengi ingkang dinten ingkang sami. Susu mau laejng dipunskim sapérangan sadèrèngipun asem laktat dipuntambah. Susu lajeng dipunpanasaken kanthi suhu 31-33 °C lan dipuntambah kaliyan rennet.^[2] Bibar punika lajeng dipuntugel nanging boten dipundamel garing lajeng dipunpanasaken ugi dipunudhak lan dipunpanasaken malih kanthi suhu 53-56 °C.^[2] Bibar punika kèju dipunjarke kemawon kirang langkung setengah jam dumugi satunggal jam.^[2] Prosès anggènipun damel Grana Padano sami kaliyan kèju Parmigiano-Reggiano, nanging Grana Padano dipunproduksi sedawaning taun déné Parmigiano-Reggiano namung ngginakaken susu saking mangsa panas.^[4] Amargi dipundamel kanthi cacah ingkang kathah saéngga regi kèju Grana Padano langkung mirah tinimbang Parmigiano-Reggiano.

Ugi pirsani

Cathetan suku

↑ ^a ^b Harbutt, Juliet (2006). The World Encyclopedia of Cheese. Anness Publishing Ltd. ISBN 978-1-84309-960-4. Page 51.
↑ ^a ^b ^c ^d Grana Padano Archived 2010-02-08 at the Wayback Machine., Practically Edible.
↑ ^a ^b ^c ^d ^e ^f ^g ^h ⁱ Grana, The King of Cheese Archived 2010-03-23 at the Wayback Machine., Ital Trade.
↑ "The Cheeses of Italy" (PDF). Italin Made. Italin Institute of Foreign Trade. 2000. Diarsip saka sing asli (PDF) ing 2011-02-04. Dibukak ing 2013-03-24.

Pranala njawi

[encyclopedia-1] Harbutt, Juliet (2006). The World Encyclopedia of Cheese. Anness Publishing Ltd. ISBN 978-1-84309-960-4. Page 51.

[edible-2] Grana Padano Archived 2010-02-08 at the Wayback Machine., Practically Edible.

[ital-3] ↑ ^a ^b ^c ^d ^e ^f ^g ^h ⁱ Grana, The King of Cheese Archived 2010-03-23 at the Wayback Machine., Ital Trade.

[cheese_of_italy-4] "The Cheeses of Italy" (PDF). Italin Made. Italin Institute of Foreign Trade. 2000. Diarsip saka sing asli (PDF) ing 2011-02-04. Dibukak ing 2013-03-24.

[1]

[2]

[3]

[4]