Jenéwa

Jenéwa Genève
Info dhasar:
Nagara:	Switserlan
Kanton:	Jenéwa
Dhistrik:	Kutha Jenéwa ora dipérang ing dhistrik
Dhuwur:	375 méter sadhuwuring sagara
Jembar:	15.86 km²
Padunung:	185.893 (31 Dhésèmber 2006)
Situs wèb resmi:	www.ville-ge.ch
Péta

Jenéwa (Prancis: Genève, Jerman: Genf, Italia: Ginevra, Reto-Roman Genevra) yaiku kutha paling padhet kaloro ing Switserlan (sawisé Zürich), dumunung ing pinggir Tlaga Jenéwa kang mili menyang Kali Rhône. Kutha iki minangka kutha krajan saka République et Canton de Genève. Kutha iki uga misuwur minangka Kutha Air Mancur ing Nagara Switserlan

Géografis

Kutha Jenéwa iku ana ing nagara Switserlan, luwih tepaté ing Kanton Jenéwa. Kanton Jenéwa diwatesi nagara Prancis ing sisih kulon lan sisih kidul. Ing sisih lor lan lor-wétan, Kanton Jenéwa diwatesi déning Kanton Vaud. Ing tengah-tengahé ana tlaga, jenengé tlaga Leman, kang uga dadi duwèké nagara Prancis.

Dhémografi

Sanadyan kutha Jenéwa kawentar ing ngendi-endi, sajatiné kutha iki kutha cilik, amarga cacahing wong kang manggon ana ing kutha iki ora punjul wong 180.000. Saka cacahé iku, kurang luwih 30% wongé saka nagara liya kang manggon lan nyambut gawé ana ing Jenéwa. Cacahé wong ana ing Kanton Jenéwa uga sithik, ora punjul wong 430.000.

Kutha Banyu Muncrat (Air Mancur)

Jenéwa kondhang lan cukup kawentar amarga:

• Kutha kanggo nyimpen dhuwit. Ana akèh bank-bank umum lan bank pribadi ing kutha iki. Bank Umum iku tegesé bank kang nglayani wong kang nyimpen lan utang dhuwit. Bank pribadi iki tegesé bank kang ngurusi dhuwit pribadi, mligi kanggo urusan invèstasi. Akèh wong sugih kang duwé lan nyimpen dhuwit ing kutha iki, amarga bank-bank ing kéné duwé daya kanggo nyimpen data pribadi pelanggané.
• Kutha jam tangan. Jam tangan kaya Swatch, Rado, Pathek Philippe, lan mèrek-mèrek liyané padha duwé kantor pusat ing Jenéwa. Jaman ndhisik, pabrik-pabrik jam tangan iku ana ing Jenéwa, nanging saiki ana akèh kang pindhah saka kutha iki kanggo duwé panggonan kang luwih jembar lan uga kanggo nyuda reragatan-reragatan liyané.
• Kutha banyu muncrat. Ing pinggir tlaga Leman, ana banyu muncrat, kang ing basa Prancis diarani, "Jet d'Eau". Dhuwuré muncratan banyuné bisa tekan 130 mèter. Banyu puncratan iku dijupuk saka banyu tlaga kang diréwangi ngganggo mesin. Banyu iku muncrat mung ing mangsa panas, utawa pas ana srengéngé. Mangsa bediding, mesin kang dienggo muncrataké banyu ora diuripaké mergané, puncratan banyuné bisa adhem banget.
• Kutha PBB. Kantor Pakumpulan Bangsa-bangsa uga ana ing kéné, amarga kutha Jenéwa iku kutha PBB kaping pindho sawisé New York. Saliyané PBB, ana uga 18 kantor organisasi-organisasi internasional.

Panorama

Pasawangan Jénéwa.

Pasawangan Jénéwa dideleng saka menara Katedral Santo Petrus.

Basa

Nagara Switserlan duwé patang (4) basa kang dienggo, yaiku basa Jerman (60-70 persèn), basa Prancis (18-20 persèn), basa Italia (8-10 persèn) lan basa Romansh, kurang luwih 1-2 persèn. Kanton-kanton kang nganggo basa Prancis dijenengi kanton Romand (aja klèru karo Romash). Jenéwa iku kutha gedhé dhéwé ing Switserlan Romand, lan basa utama kang dienggo yaiku basa Prancis. Nanging akèh wong Jenéwa kang bisa ngomong basa Inggris, mergané akèh wong manca nagara kang ora bisa basa Prancis.

Agama

Agama Kristen Protèstan aliran Kalvin diwiwiti ing kutha iki. Jenéwa uga diarani kutha krajané Protèstan Kalvinis. Gréja utama ing Jenéwa yaiku Katedral Santo Petrus, ndhisiké gréja Katulik, kang saiki dadi gréja Protèstan. Sanadyan, tradhisi protèstan isih kuwat banget, naging gunggung jiwa kang duwé paugeman Katulik luwih akèh tinimbang Protèstan, amarga ing wiwitan abad 20 akèh désa-désa Katulik Prancis kang cedhak karo Jenéwa, mèlu dilebokaké ing kanton Jenéwa. Uga amarga akèh wong-wong Portugal, Spanyol lan Italia kang pindhah saka nagara-nagarané lan netep ing Jenéwa. Saliyané Katulik lan Protèstan, uga gampang ditemoni wong-wong kang paugemané Islam, Hindhu lan Buda. Akèh uga wong-wong enom kang ora perduli manèh karo agama, lan ora duwé agama.

Organisasi Internasional

Kutha Jenéwa minangka markas saka sawatara organisasi internasional, antarané:

• Markas PBB ing Éropa
• WHO
• ILO
• UNHCR
• United Nations High Commissioner for Human Rights
• WTO
• WIPO
• ITU
• WMO
• Inter-Parliamentary Union
• International Committee of the Red Cross
• International AIDS Society
• World Economic Forum
• CERN
• ISO
• World Wide Web Virtual Library
• World Council of Churches

Transportasi

Kanggo transportasi saka lan menyang kutha Jenéwa, ana Papan Anggegana Internasional Cointrin Jenéwa lan kutha iki uga lumebu sajeroning jaringan utama sepur Switserlan, SBB-CFF-FFS lan Prancis yaiku sepur TGV.

Pariwisata

Obyèk pariwisata utama Jenéwa iku Jet d'Eau (jet-banyu utawa banyu muncrat) kang dhuwuré 140 mèter ing tlaga Jenéwa lan bisa ditonton saka saindhenging kutha. Panggonan wisata liyané antarané: Flower Clock, Art and History Musiyum (Musiyum Seni lan Sajarah), International Red Cross and Red Crescent Musiyum (Musiyum Palang Merah lan Bulan Sabit Merah Internasional), sarta Palais des Nations kang dadi markas PBB ing Éropa.

Pranala njaba

Resmi

• Geneva – Welcome to Networld
• Situs resmi kutha Jenéwa
• Situs resmi Kanton Jenéwa (ing basa Prancis)
• The official Chestnut Tree Archived 2010-03-30 at the Wayback Machine., ing situs Kanton Jenéwa (ing basa Prancis)
• Transportasi umum Jenéwa
• Panuntun plesiran Jenéwa saka Wikiwisata
• Kantor informasi turis Jenéwa Archived 2005-03-18 at the Wayback Machine.