Mangsa paceklik

Mangsa paceklik ya iku mangsa susah pangan, amarga ing mangsa iki tuwuhan susah urip lan uga ora ana panènan. Lumrahé ing mangsa paceklik iki reregan kebutuhan sandhang pangan dadi larang lan para among tani ora duwé pengasilan amarga tuwuhan ora subur malah kerep dadi gagal panèn. Ing tlatah sawah tadhah udan racaké mangsa paceklik iku kedadéyan ing mangsa pancaroba lan mangsa katiga amarga curah udan mung sethithik lan ora nyukupi kanggo kabutuhan tetuwuhan. Kanggo ngatasi kakurangan pangan, para kadang tani biasa nenandur palawija kaya ta jagung, ketéla pohung, ketéla rambat, ganyong utawa kaérut. Asil palawija iki bisa kanggo pangan kulawarga kang kakurangan pari utawa beras kang wis dadi kabutuhan pokoké.

Wong tani ing Kerala India

Penyakit

Ing mangsa paceklik iki racaké banjur disusul usum penyakit. Bab iki disebabaké anané kakurangan gizi lan sanitasi kang kurang olèh kawigatèn. Rega obat-obatan uga larang saéngga para padunung ora kuwagang tuku obat. Kaanan kaya ngéné iki banjur bisa nuwuhaké pageblug. Kanthi anané kabiasaan iki, para padunung karang padésan banjur padha nandur tuwuhan obat kulawarga, supaya bisa nambani warga kang ketaman lara, nganggo obat-obatan hèrbal utawa jamu.