Ignatius Slamet Rijadi
Brigadir Jendral TNI Anumerta Ignatius Slamet Rijadi (EYD: Riyadi; lair ing Surakarta, Jawa Tengah, 26 Juli 1927 – pati ing Ambon, Maluku, 4 Novèmber 1950 ing umur 23 taun) ya iku salah sawijiné prajurit Indonésia. Dicaritakaké Slamet Riyadi prayata prajurit sing kendel, tatag lan tanggon. Kuwanèné Slamet Ritadi uga kacihna nalika mandhégani wadyabalané perang mungsuh bala Walanda ngebroki Ambarawa, Srondhol, Mranggèn, lan Semarang.
Ora mung iku, Slamet Riyadi uga tau kajibah mbrasta rerusuh ing laladan Gunung Merapi-Gunung Merbabu, lan uga numpes obahan APRA Westerling ing tanah Jawa Kulon.
Tanggal 19 Dhésèmber taun 1948 bala Walanda nyerang banjur ngebroki kutha Ngayogyakarta, kutha punjering papréntahané Nagara Républik Indonésia. Kajaba kutha Ngayogyakarta, Walanda uga ngebroki kutha-kutha gedhé liyané ing Tanah Jawa Tengah, kaya ta Sala, Ambarawa, lan Semarang. Weruh krénahé bala Walanda iku, ora katalompèn bangsa Indonésia, gedhé cilik, tuwa enom, lanang wadon, padha cancut gumregut siyeg saéka kapti, ngadani perang mungsuh bangsa Walanda sing murang tata, ambeg adigang, adigung, lan adiguna iku. Ing saenggon-enggon rakyat padha asikep gegaman sakecekelè, ngadani perang gerilya, perang kanthi cara dhedhemitan. Kacarita, ing kutha Sala bala Républik sing dipanggedhèni déning Letnan Kolonel Slamet Riyadi ngamuk punggung pindha banthèng ketaton, agawé kekes lan mirising atiné wadyabala Walanda. Satemah, wadyabala Walanda padha ndelik ana ing sajeroning bètèng, ora wani ngatonaké rainé.