Widji Thukul

Widji Thukul, utawi ingkang gadhah nama asli Widji Widodo inggih salah satunggaling sastrawan saha pujangga lan aktivis ing Indonésia ingkang miyos wonten ing kampung Sorogenen, Sala, ing tanggal 26 Agustus 1963. Widji Thukul miyos saking kulawarga tukang becak. Déné piyambakipun sampun remen nyerat puisi wiwit SD saha remen kaliyan dunya téater nalika sekolah ing SMP. Sareng kaliyan golongan Teater Jagat ipun, piyambakipun sampun naté dados pengamen puisi ingkang mlebet kampung saha kitha saking kampung setungga dhateng kampung sanèsipun. Widji Thukul ugi sampun naté gesang kanthi dodolan koran, dados calo karcis biyoskup, saha dados tukang pelitur ing satunggaling perusahaan mebel. Sasampunipun rampung saking sekolah SMP, Widji Thukul lajeng nerasaken sekolah ing Sekolah Menengah Karawitan Indonesia (SMKI) Sala jurusan jogèd ngantos kelas kalih amargi boten gadhah arta.

Widji Thukul

Padamelanipun

Sanajan boten gadhah arta kanggé nerasaken sekolahipun, Widji Thukul taksih aktip mentasaken kagiyatan teater saha nglukis kaliyan laré-laré ing kampungipun ing Kalangan, ing papan anggènipun piyambakipun saha garwa lan putra-putranipun sami lenggah. Ing taun 1994, sampun naté kadadosan aksi saking tani ing Ngawi, Jawa Wétan lan piyambakipun ingkang mandhegani masa kasebat saha ngawontenaken orasi saéngga piyambakipun dipuncekel pulisi saha dipungebuki kaliyan militèr.

Asiling Karya

Wonten tigang sajakipun Widji Thukul ingkang misuwur saha dados sajak wajib ing saben aksi-aksi demonipun, inggih punika Peringatan, Sajak Suara, saha Bunga dan Tembok (ingkang sedayanipun kapacak wonten ing antologi "Mencari Tanah Lapang" ingkang dipunwedalaken déning Manus Amici, Walanda ing taun 1994. Nanging sajatosipun antologi kasebat dipunwedalaken kanthi kerjasam KITLV saha penerbit Hasta Mitra, Jakarta.

• Kekalih kempalan puisinipun inggih punika: Puisi Pelo saha Darman lan sanès-sanèsipun ingkang dipunwedalaken déning Taman Budaya Surakarta.
• Puisi: Bunga dan Tembok
• Puisi: Peringatan
• Puisi: Kesaksian

Prestasi dan penghargaan

• 1989, piymbakipun sampun naté dipunundhang wonten ing Kedubes Jerman ingkang mapan wonten ing Jakarta déning Goethe Institut.
• 1991, piyambakipun sampun naté ngamen wonten ing Pasar Malam Puisi (Erasmus Huis; Pusat Kebudayaan Walanda, Jakarta).
• 1991, piyambakipun pikantuk Wertheim Encourage Award ingkang dipuncaosaken Wertheim Stichting, Walanda, sesarengan kaliyan WS Rendra.
• 2002, pikantuk penghargaan "Yap Thiam Hien Award 2002"
• 2002, satunggaling filem dokumenter ngenging Widji Thukul ingkang dipundamel déning Tinuk Yampolsky.