ꦒꦸꦤꦸꦁꦭꦮꦸ

Aksara Latin

ꦗꦮ

ꦒꦸꦤꦸꦁꦭꦮꦸ (3.265 m) ꦢꦸꦩꦸꦤꦸꦁ ꦲꦶꦁ ꦥꦸꦭꦺꦴ ꦗꦮ, ꦆꦤ꧀ꦝꦺꦴꦤꦺꦱꦶꦪ, ꦥꦼꦂꦱꦶꦱ꧀ꦱꦺ ꦲꦶꦁ ꦮꦠꦼꦱ꧀ ꦥꦿꦺꦴꦥ꦳ꦶꦤ꧀ꦱꦶ ꦗꦮ ꦠꦼꦔꦃ ꦭꦤ꧀ ꦗꦮ ꦮꦺꦠꦤ꧀. ꦱ꧀ꦠꦠꦸꦱ꧀ ꦒꦸꦤꦸꦁ ꦲꦶꦏꦶ ꦪꦲꦶꦏꦸ ꦒꦸꦤꦸꦁ ꦒꦼꦤꦶ "ꦲꦶꦱ꧀ꦠꦶꦫꦲꦠ꧀" ꦭꦤ꧀ ꦮꦶꦱ꧀ ꦱꦸꦮꦺ ꦲꦺꦴꦫ ꦄꦏ꧀ꦠꦶꦥ꦳꧀, ꦏꦠꦺꦴꦤ꧀ ꦱꦏ ꦫꦥꦼꦠ꧀ꦠꦺ ꦥ꦳ꦺꦒꦺꦠꦱꦶ ꦱꦂꦠ ꦥꦸꦕꦸꦏ꧀ꦏꦺ ꦏꦁ ꦏꦼꦤ ꦌꦫꦺꦴꦱꦶ. ꦲꦶꦁ ꦭꦺꦫꦺꦁꦔꦺ ꦲꦤ ꦏꦼꦥꦸꦤ꧀ꦝꦤ꧀ ꦕꦶꦭꦶꦏ꧀ ꦏꦁ ꦲꦶꦱꦶꦃ ꦔꦼꦠꦺꦴꦏ꧀ꦏꦏꦺ ꦏꦼꦭꦸꦏ꧀ (ꦥ꦳ꦸꦩꦫꦺꦴꦭ꧀) ꦭꦤ꧀ ꦮꦼꦭꦶꦫꦁ (ꦱꦺꦴꦭ꧀ꦥ꦳ꦠꦫ). ꦒꦸꦤꦸꦁꦭꦮꦸ ꦢꦸꦮꦺ ꦏꦮꦱ꧀ꦱꦤ꧀ ꦲꦭꦱ꧀ ꦢꦶꦥ꧀ꦠꦺꦫꦺꦴꦏꦂꦥ꧀ ꦧꦸꦏꦶꦠ꧀, ꦲꦭꦱ꧀ ꦢꦶꦥ꧀ꦠꦺꦫꦺꦴꦏꦂꦥ꧀ ꦲꦠꦱ꧀, ꦲꦭꦱ꧀ ꦩꦺꦴꦤ꧀ꦠꦤꦼ, ꦭꦤ꧀ ꦲꦭꦱ꧀ ꦌꦫꦶꦏꦱꦶꦪꦸꦱ꧀.

ꦒꦸꦤꦸꦁꦭꦮꦸ
Titik dhuwur dhéwé
Èlevasi	3,265 ꦩꦺꦠꦼꦂ (10,712 ft)
Prominèn	3,118 ꦩꦺꦠꦼꦂ (10,230 ft)
Pratélan	ꦈꦭ꧀ꦪꦿ ꦫꦶꦧꦸ
Géografi
Location	ꦗꦮ, ꦆꦤ꧀ꦝꦺꦴꦤꦺꦱꦶꦪ
Géologi
Jinisé gunung	ꦱ꧀ꦠꦿꦥ꦳ꦺꦴꦭ꧀ꦏꦤꦺꦴ
Panjeblug pungkasan	1885

ꦒꦸꦤꦸꦁꦭꦮꦸ ꦢꦸꦮꦺ ꦭꦺꦴꦫꦺꦴ ꦥꦸꦕꦸꦏ꧀, ꦥꦸꦕꦸꦏ꧀ ꦲꦂꦒ ꦢꦊꦩ꧀ ꦭꦤ꧀ ꦲꦂꦒ ꦢꦸꦩꦶꦭꦃ. ꦏꦁ ꦥꦸꦁꦏꦱ꧀ꦱꦤ꧀ ꦲꦶꦏꦶ ꦩꦶꦤꦁꦏ ꦥꦸꦕꦸꦏ꧀ ꦏꦁ ꦥꦭꦶꦁ ꦣꦸꦮꦸꦂ.

ꦲꦶꦁ ꦭꦺꦫꦺꦁ ꦒꦸꦤꦸꦁ ꦲꦶꦏꦶ ꦲꦤ ꦱꦮꦠꦫ ꦥꦁꦒꦺꦴꦤ꧀ꦤꦤ꧀ ꦏꦁ ꦥꦺꦴꦥꦸꦭꦺꦂ ꦩꦶꦤꦁꦏ ꦗꦸꦗꦸꦒ꧀ꦒꦤ꧀ ꦥ꧀ꦭꦼꦱꦶꦂꦫꦤ꧀, ꦩ꧀ꦭꦶꦒꦶ ꦲꦶꦁ ꦭꦭꦢ꧀ꦢꦤ꧀ ꦠꦮꦁꦩꦔꦸ, ꦕꦼꦩꦫꦱꦺꦮꦸ, ꦭꦤ꧀ ꦱꦫꦁꦔꦤ꧀. ꦫꦢ ꦩꦼꦔꦶꦱꦺꦴꦂ, ꦲꦶꦁ ꦱꦶꦱꦶꦃ ꦏꦸꦭꦺꦴꦤ꧀ ꦲꦤ ꦭꦺꦴꦫꦺꦴ ꦏꦺꦴꦩ꧀ꦥ꧀ꦭꦺꦏ꧀ ꦕꦤ꧀ꦝꦶ ꦱꦏ ꦩꦁꦱ ꦥꦸꦁꦏꦱ꧀ꦱꦤ꧀ ꦩꦗꦥꦲꦶꦠ꧀: ꦕꦤ꧀ꦝꦶ ꦱꦸꦏꦸꦃ ꦭꦤ꧀ ꦕꦤ꧀ꦝꦶ ꦕꦼꦛ. ꦲꦶꦁ ꦱꦶꦏꦶꦭ꧀ ꦒꦸꦤꦸꦁ ꦲꦶꦏꦶ ꦲꦸꦒ ꦢꦸꦩꦸꦤꦸꦁ ꦏꦺꦴꦩ꧀ꦥ꧀ꦭꦺꦏ꧀ ꦥꦩꦏꦩ꧀ꦩꦤ꧀ ꦏꦼꦫꦧꦠ꧀ ꦥꦿꦗ ꦩꦁꦏꦸꦤꦒꦫꦤ꧀: ꦲꦱ꧀ꦠꦤ ꦒꦶꦫꦶꦭꦪꦸ ꦭꦤ꧀ ꦲꦱ꧀ꦠꦤ ꦩꦔꦢꦼꦒ꧀. ꦲꦶꦁ ꦕꦼꦣꦏ꧀ ꦏꦺꦴꦩ꧀ꦥ꧀ꦭꦺꦏ꧀ ꦲꦶꦏꦶ ꦢꦸꦩꦸꦤꦸꦁ ꦲꦱ꧀ꦠꦤ ꦒꦶꦫꦶꦧꦔꦸꦤ꧀, ꦥꦱꦫꦺꦪꦤ꧀ ꦏꦁꦒꦺꦴ ꦏꦸꦭꦮꦂꦒ ꦥꦿꦺꦱꦶꦣꦺꦤ꧀ ꦏꦭꦺꦴꦫꦺꦴ ꦆꦤ꧀ꦝꦺꦴꦤꦺꦱꦶꦪ, ꦱꦸꦲꦂꦠ.

ꦥꦼꦤ꧀ꦝꦏꦶꦪꦤ꧀

ꦒꦸꦤꦸꦁꦭꦮꦸ ꦥꦺꦴꦥꦸꦭꦺꦂ ꦏꦁꦒꦺꦴ ꦏꦒꦶꦪꦠ꧀ꦠꦤ꧀ ꦥꦼꦤ꧀ꦝꦏꦶꦪꦤ꧀. ꦱꦧꦼꦤ꧀ ꦩꦊꦩ꧀ 1 ꦱꦸꦫ ꦲꦏꦺꦃ ꦮꦺꦴꦁ ꦗ꦳ꦶꦪꦫꦃ ꦏꦤ꧀ꦛꦶ ꦤ꧀ꦝꦏꦶ ꦔꦤ꧀ꦠꦶ ꦠꦼꦏꦤ꧀ ꦥꦸꦕꦸꦏ꧀. ꦱꦏꦶꦁ ꦥꦺꦴꦥꦸꦭꦺꦂꦫꦺ, ꦲꦶꦁ ꦥꦸꦕꦸꦏ꧀ ꦒꦸꦤꦸꦁ ꦩꦭꦃ ꦲꦤ ꦏꦁ ꦢꦺꦴꦢꦺꦴꦭ꧀ꦭꦤ꧀ ꦥꦔꦤ꧀ꦤꦤ꧀.

ꦥꦼꦤ꧀ꦝꦏꦶꦪꦤ꧀ ꦱ꧀ꦠꦤ꧀ꦝꦂ ꦧꦶꦱ ꦢꦶꦮꦶꦮꦶꦠ꧀ꦠꦶ ꦱꦏ ꦫꦺꦴꦁ ꦥꦁꦒꦺꦴꦤ꧀ꦤꦤ꧀ (ꦧꦺꦱ꧀ꦏꦺꦩ꧀): ꦕꦼꦩꦫꦏꦤ꧀ꦝꦁ ꦲꦶꦁ ꦠꦮꦁꦩꦔꦸ, ꦗꦮ ꦠꦼꦔꦃ, ꦱꦂꦠ ꦕꦼꦩꦫꦱꦺꦮꦸ, ꦲꦶꦁ ꦱꦫꦁꦔꦤ꧀, ꦗꦮ ꦮꦺꦠꦤ꧀. ꦒꦼꦂꦧꦁ ꦩ꧀ꦭꦼꦧꦸ ꦏꦭꦺꦴꦫꦺꦴꦤꦺ ꦏꦥꦶꦱꦃ ꦩꦸꦁ 200m.

ꦥꦼꦤ꧀ꦝꦏꦶꦪꦤ꧀ ꦱꦏ ꦕꦼꦩꦫꦱꦺꦮꦸ ꦭꦶꦮꦠ꧀ ꦭꦺꦴꦫꦺꦴ ꦱꦸꦩ꧀ꦧꦼꦂ ꦧꦚꦸ: ꦱꦼꦤ꧀ꦝꦁ ꦥꦔꦸꦫꦶꦥ꧀ꦥꦤ꧀ ꦢꦸꦩꦸꦤꦸꦁ ꦲꦤ꧀ꦠꦫ ꦕꦼꦩꦫꦱꦺꦮꦸ ꦭꦤ꧀ ꦥꦺꦴꦱ꧀ 1, ꦭꦤ꧀ ꦱꦼꦤ꧀ꦝꦁ ꦢꦿꦗꦠ꧀ ꦲꦤ꧀ꦠꦫꦤꦺ ꦥꦺꦴꦱ꧀ 4 ꦭꦤ꧀ ꦥꦺꦴꦱ꧀ 5.

ꦥꦼꦤ꧀ꦝꦏꦶꦪꦤ꧀ ꦭꦶꦮꦠ꧀ ꦕꦼꦩꦫꦏꦤ꧀ꦝꦁ ꦧꦏꦭ꧀ ꦔ꧀ꦭꦶꦮꦠ꧀ꦠꦶ 5 ꦱꦺꦭ꧀ꦠꦼꦂ ꦏꦤ꧀ꦛꦶ ꦗꦭꦸꦂ ꦏꦁ ꦫꦺꦭꦠꦶꦥ꦳꧀ ꦮꦶꦱ꧀ ꦏꦠꦠ ꦏꦤ꧀ꦛꦶ ꦲꦥꦶꦏ꧀.

ꦢꦼꦊꦁ ꦲꦸꦒ

• ꦥꦿꦠꦺꦭ꧀ꦭꦤ꧀ ꦒꦸꦤꦸꦁ ꦲꦶꦁ ꦆꦤ꧀ꦝꦺꦴꦤꦺꦱꦶꦪ
• ꦥꦿꦠꦺꦭ꧀ꦭꦤ꧀ ꦒꦸꦤꦸꦁ