Martabak
Aksara Latin
|
Martabak (saka basa Arab مُطبَّق mutabbaq) yaiku panganan khas asli saka Wétan Tengah.[1] Martabak iku kalebu jinising panganan prasaja nanging patut kanggo pasugatan tamu.[1] Panganan iki gampang anggoné nggawé, utawa yèn wegah nggawé ya gampang anggoné golèk (tuku).[1] Jajanan iki mathuk yèn didhahar karo tèh utawa kopi.[2] Wiwit saka masarakat ékonomi ngisor nganti masarakat kang ékonominé dhuwur uga seneng panganan martabak.[1]
Jinising martabak besut
Martabak iku akèh banget jinisé, nanging sing paling disenengi iku ana rong jinis, yaiku
- Martabak manis utawa sing diarani kue terang bulan lan uga ana sing ngarani kué bandung. Martabak manis iki isèn-isèné racaké soklat, kacang, keju lan miturut kasenengané sing gawé.[3]
- Martabak endhog.[1] Banjur yèn martabak endhog isiné ya endhog, nanging uga ana sing diisi daging kaya ta daging ayam utawa wedhus utawa sapi.[3]
Bahan besut
Martabak manis, digawé saka adonan glepung terigu, kang wis dicampuri karo endhog, margarin, susu, baking powder, gula.[3] Bahan kanggo isi martabak manis bisa diisi kacang, soklat, keju, lan apa kang dadi kasenengané sing nggawé.[4] Éwadéné martabak endhog, digawé saka adonan glepung terigu kang gedhéné padha karo ukuran endhog pitik.[1] Adonan iku mau bahané terigu, endhog, uyah, lan banyu sacukupé.[2] Banjur bahan kanggo isiné bisa diwènèhi unclang, daging, endhog, lan godhong bawang.[2]
Cara nggawé besut
Martabak manis, jladrèné iku dipanasaké ing wajan, lan diisi karo soklat, kacang, lan liya-liyané kaya sing dipengini.[4] Ditunggu jladrèné nganti mateng, kira-kira 10 menit banjur martabaké wis siyap dimaem.[5]
Martabak endhog, jladrèné iku dibanting, ditipisaké lan diuncalaké ana ing sèng utawa kanggo nggawé martabak iku.[2] Banjur yèn jladrèn wis tipis, jladrèn digorèng ing wajan banjur diisi karo daging, unclang, janganan, lan bumbu.[2] Yèn wis digorèng lan diisi sayuran banjur adonan diwolak-walik, sawisé iku dientèni limang menit banjur martabak siyap dicawisaké ning méja lan dimaem.[5] Déné martabak endhog iku padatan digawé saka glepung terigu, endhog, lan godhong bawang.[2]
Cathetan suku besut
- ↑ a b c d e f "resepmasakanindonesia.info". Diarsip saka sing asli ing 2016-07-10. Dibukak ing 2011-04-26.
- ↑ a b c d e f "forumnova.tabloidnova". Diarsip saka sing asli ing 2011-01-01. Dibukak ing 2011-04-26.
- ↑ a b c "resep martabak". Diarsip saka sing asli ing 2011-10-27. Dibukak ing 2011-04-28.
- ↑ a b martabak
- ↑ a b Martabak Archived 2016-01-10 at the Wayback Machine. (27 Mèi 2011)
 | Artikel magepokan panganan iki minangka artikel rintisan. Kowé bisa ngéwangi Wikipédia ngembangaké. |