Mi ongklok ya iku sawijining panganan khas saka Kabupatèn Wanasaba.[1] Miturut carita, wong kang wiwitane nggawé mi ongklok ya iku Pak Muhadi.[2] Mi ongklok digawé saka mi kuning lan janganan.[1] Yèn mi liya padatan nganggo sawi, mi ongklok nganggo kul lan kucai mentah.[1] Kanggo nyuguhake mi ongklok, mi, kul, lan kucai mung dilebokake ing saringan kang digawé saka pring lan diongklok-ongklok ing banyu umub.[1] Mi lan janganan ditata ing mangkok banjur diwènèhi duduh ping pindho.[1] Sepisan, duduh kenthel warnané coklat kang digawé saka campuran pati pohung, gula abang, ebi, lan resep liyané. Sawisé duduh iku, mi diwènèhi duduh manèh ya iku duduh bumbu kacang lan disawuri mrica bubuk lan brambang goreng.[1] Yèn kepéngin pedhes bisa nganggo lombok rawit kang wis dialusake ing mangkok.[1]

Mi ongklok Wonosobo

Mi ongklok padatan dipangan karo sate sapi (bumbu kacang lan kecap), tempe kemul (ya iku tempe kang dikemuli nganggo jladren gandum kang diwènèhi kunir supaya warnané dadi kuning lan irisan kucai), lan lekok utawa geblek (ya iku panganan saka gandum kang digoreng, padatan diarani cirèng).[2]

Cathetan suku besut