Talaga Remis

Talaga Remis punika papan pariwisata ingkang mapan wonten ing Kabupatèn Kuningan mliginipun wonten ing kaki Gunung Ceremai ing Désa Kaduela, Kacamatan Pasawahan, Kabupatèn Kuningan, Jawa Barat . Jarakipun saking kutha Kuningan kirang langkung 37 kilomèter, déné manawi saking Cirebon punika kirang langkung 13 kilomèter. Papan pariwisata punika winatesan kaliyan Kabupatèn Cirebon mliginipun Désa Cikalahang. Wiyaripun Talaga remis punika 3,25 hektar déné jeronipun dumugi 12 mèter saéngga toyanipun katingal bening .

Talaga Remis

Wana wisata Talaga Remis punika wiyaripun kirang langkung 13 Ha, déné wiyaripun tlaga punika 3,25 Ha lan dipunkelola déning Perum Kehutanan Kabupatèn Kuningan. Ing kawasan Talaga Remis punika wonten 8 tlaga kados ta Tlaga Deleg, Tlaga Tespong, Tlaga Leat, Tlaga Leutik, Situ Ayu Salintang, Sumur Jalatunda, Tlaga Buruy, lan Tlaga Nilem . Wana wisata talaga Remis nyimpen manéka warni flora lan fauna kanthi jumlah kirang langkung 160 jinis tuwuhan kados ta sonokeling, malaka, kesambi lan sanèsipun. Salah satunggal ing dados daya tarik papan punika ya iku jinis tuwuhan langka Pisang Hyang.

Ètimologi

Nama Talaga Remis punika gadhah teges piyambak, nama talaga punika Basa Sunda saking tembung telaga. Déné tembung remis mau dipunpendhet saking kéwan jinising kerang kanthi warna kuning ingkang kathah wonten ing kiwa-tengené tlaga, kéwan mau kawéntar kanthi sebatan remis.

Sajarah

Miturut cariyos ingkang nyebar kanthi lesan ing masarakat Jawa Barat dhedhasar cariyos ingkang turun temurun punika, bilih Talaga Remis asalipun saking cucuran air mata Pangeran Salingsingan ingkang nangis boten mandheg nalika nampi wejangan saking Pangeran Sutajaya ingkang dados satunggaling kapitadosan Sultan Cirebon. Pangeran kalih punika nangis amargi rumangsa dosa sampun khianat dhateng nagaranipun amargi pangeran kekalih punika sami mungsuhan. Saéngga kadadosan perang trus-trusan saged mandeg sasampunipun dipunpisah lan dipunparingi wejangan déning Pangeran Sutajaya. Sapunika makan Pangeran Selingsingan wonten ing pinggiring Talaga Remis ingkang boten kénging dipunpirsani langsung déning para wisatawan . Kajawi punika wonten ugi cariyos Pangeran Purabaya ingkang wujudipun dados bulus utawi kura-kura. Bulus mau dipunparingi nama Si Mendung Purabaya ingkang gadhah wujud béda kaliyan sanèsipun.