Tlaga Jongé
Koordhinat: 8°00′39″S 110°37′32″E / 8.0108333°S 110.6255556°E
Tlaga Jongé punika salah satunggaling papan wisata awujud telaga ingkang mapan wonten ing Dhusun Jongé, Désa Pacareja, Kacamatan Semanu, Kabupatèn Gunungkidul. Kirang langkung 50 kilomèter saking kutha Yogyakarta [1]. Miturut kapitayan masarakat wonten ing mriku, wontenipun tlaga Jongé kawiwitan saking lelampahan cariyos Kyai Jongé inggih punika cikal bakal wontenipun Telaga Jongé.
Saben dinten ing Tlaga Jongé punika kathah para wisatawan. Nanging para wisatawan punika kedah nggatosaken menapa kemawon pantangan-pantangan ingkang dipunpitadosi déning masarakat ing mriku kanggé ngurmati Kyai Jongé. Ing tlaga jonge punika boten kénging matur kanthi tembung ingkang saru, saha boten pareng zina wonten ing mriku. Saben malem Jumat legi, asring wonten tiyang ingkang ngampahi tirakat ing kiwa-tengené Tlaga Jongé. kanggé tiyang ingkang kuat anggènipun laku prihatin mitosipun saged mirsani Kyai Jonge lan makamipun. Saben taun Tlaga Jongé punika kanggé upacara adat. Ingkang kawéntar kanthi nama Upacara adat bersih Telaga Jongé. Upacara punika dipunadani nalika ngancik mangsa rendheng, kirang langkung ing wulan Oktober utawi Jumadhilakir wulan Jawa [2].
Sajarah Tlaga Jongé
besutMiturut cariyos, kala rumiyin Kyai Jonge dipundampingi déning enem kanca nyusur Pasisir kidul kanthi prahu ingkang dipusebut Jung kanggé nyelametaken piyambakipun saking prajurit Demak. Nalika nembé mlampah prahu mau dipunantem déning ombaking Pasisir kidul lan dumugi Gunung Sewu. Wonten ing papan punika wonten wit kanthi nama wit jitu. Kyai Jongé sakrombongan banjur ngaso wonten ngandhaping wit mau.
Miturut cariyos papan ingkang kanggé ngaso Kyai Jongé kaliyan enem kancanipun dipunparingi nama Jepitu. sasampunipun ngaso banjur Kyai Jongé saha rombongan nglajengaken lelampahan kanthi pisah satunggal-satunggal. Déné Kyai Jongé mlampah dhateng jaten ing désa Pacareja.
Masarakat ing désa punika nampi rawuhipun Kyai Jongé kanthi seneng amargi Kyai Jongé punika gadhah tindhak tandhuk ingkang saé saha asring paring pitulungan dhateng sesami kanthi kasektènipun. Kyai Jonge punika ugi ahli wonten ing babagan tetanen saéngga gesanging masarakat ing mriku dados makmur. Saya dangu kasektènipun Kyai Jonge kamirengaken dumugi njawi désa Pacareja. Lajeng kathah ingkang marang Kyai Jongé kanggé maguru.
Nalika Kyai Jonge kapundhut déning Gusti kanthi mukswa tilasing dalemipun Kyai Jonge dados telaga ageng kebak toya ingkang saged kanggé nguripi masarakat. Kanggé ngeling-eling jasanipun Kyai Jonge, laladan meinika banjur dipunparingi nama Dukuh Jonge lan telaganipun dados Telaga Jonge [2].
Cathetan suku
besut- ↑ [1] Archived 2012-08-18 at the Wayback Machine., Wisata alam Telaga Jonge Pacareja, Semanu, Gunungkidul (dipun-akses tanggal 27 Oktober 2012).
- ↑ a b [2] Archived 2012-07-11 at the Wayback Machine., Telaga Jonge-Jogjatrip (dipun-akses tanggal 27 Oktober 2012).