Prasasti Wurare
Prasasti Wurare iku prasasti kang isiné mèngeti penobatan arca Mahaksobhya ing sawijining panggonan kang arané Wurare (saéngga prasastiné diarani Prasasti Wurare). Prasasti iki ditulis ing basa Sansekerta lan tarikhé 1211 Saka utawa 21 November 1289.[1] Arca mau minangka pakurmatan lan pralambang kanggo Raja Kertanagara saka karajan Singasari, kang dianggep déning trahé wis ngancik drajat Jina (Buda Agung). Déné tulisan prasastiné dumunung ing alas rapik arca Buda mau, kang ditulis mubeng ing pérangan ngisoré.
Prasasti iki dhapuré sajak 19 pada, kang ing antarané nyritakaké babagan sawijining pendeta sekti jenenge Arrya Bharad kang nyigar tlatah Jawa dadi rong karajan kanthi banyu ajaib saka kendhiné. Saéngga saben sigaran dadi Janggala lan Pangjalu. Nyigaré iku ditindakaké kanggo ngindhari perang sadulur antarané pangeran loro kang péngin ngrebutaké kekuwasaan.[2][3]
Arca wiwit tinemu ing laladan Kandang Gajak. Kandang Gajak kalebu ing laladan désa Bejijong, Kacamatan Trowulan, Kabupatèn Mojokerto. Ing taun 1817, arca dipindhah menyang Surabaya déning Residen Baron A.M. Th. de Salis lan saiki ana ing Taman Apsari, celak pusat kutha Surabaya, Jawa Wétan.[4]
Uga delengen
besutCathetan suku
besut- ↑ H. Kern, De Sanskrit-inscriptie van het Mahaksobhya-beeld te Simpang (stad Surabaya, 1211 Saka) VG, VII, 1917, hlm. 187-189.
- ↑ Prasasti Wurare, bait ke-3 s.d. ke-6.
- ↑ Poesponegoro, Marwati Djoened, Nugroho Notosusanto. Sejarah nasional Indonesia II: Zaman kuno, cet. 2 (Edisi Pemutakhiran), Jakarta, Balai Pustaka, 2008. Diakses 24 Fèbruari 2012.
- ↑ Wisata Religi: j. Joko Dolog Archived 2012-03-10 at the Wayback Machine., Situs Resmi Pamaréntah Kota Surabaya, www.surabaya.go.id. (Diundhuh 24 Fèbruari 2012)