Taman Hyde, Sydney

Taman Hyde punika satunggaling taman ageng ingkang wonten ing Sydney, New South Wales, Australia [1]. Taman Hyde utawi kawentar kanthi Basa Inggris Hyde Park punika mapan wonten ing sisih wétan distrik bisnis pusat Sydney. Punika kalebet taman paling kidul ing jaringan taman ing wonten ing sedawaning saking lor tumuju pasisir Port jackson (Sydney Harbour). Mbentuk bujur sangkar sembarang, pasagi ing ujung kidul, lan bunder ing ujung lor. Ing sisih kulon winatesan kaliyan ELizabeth Street, ing sisih wétan winatesan kaliyan College Street, ing sisih lor kaliyan Park Street ingkang mbentang wétan-kulon.

Toya mancur ing Taman Hyde, Sydney

Taman Hyde punika kalebet taman ingkang paling tuwa ing Australia. Amargi taman punika sampun wonten wiwit saking taun 1810. Taman Hyde piyambak kapérang dados kalih pérangan, inggih punika pérangan kidul lan lor. Ing pérangan lor punika wonten Grojogan Archibald ingkang dados ikon saking Taman Hyde punika. Wonten ing mriki wonten manéka téma taman ingkang saged dados inspirasi kados Taman Sandringham lan Taman Nagoya. Déné ingkang sisih kidul punika wonten grojogan ageng ing tengahing kolam ingkang wiyar sanget kanthi rerenggan patung wonten ing nginggilipun. Kajawi punika wonten ugi Wangunan Memorial ANZAC utawi ANZAC Memorial Building lan pusat pengunjung ingkang kebak kaliyan komponèn sajarah Asutralia lan mliginipun kutha Sydney[2].

Amargi ngandhut unsur sajarah lan dados taman paling wiyar ingkang kathah wisatawanipun, Taman Hyde Sydney punika asring dipun-ginakaken kanggé pagelaran acara utawi festival Sydney. Maneka acara kabudayan ingkang naté dipungelar wonten ing Taman Hyde Sydney punika kados ta Sydney Festival, Australia Day, ANZAC Day, lan The Food and Wine Fair [2].

Monumèn besut

Pérangan tengah Taman Hyde punika Archibald Fountain utawi toya mancur Archibald. Toya mancur punika dipunrancang déning François Sicard lan dipunsumbang déning J.F. Archibald ing taun 1932 kanggé ngregani konstribusi Australia ing Perang Dunia I wonten ing Perancis. Ing ujung lor ugi wonten Taman Nagoya ingkang wonten papan catur raksasa lan lawang kanggé mlebet dhateng Stasiun Kréta St. James.

Ing sakiduling taman punika ANZAC War Memorial ing sawingingkingipun Lake of Reflections lan lawang kanggé mlebet dhateng Musiyum Stasiun Keréta. Satunggaling monumen kanthi isi senjata 104 militèr saking kapal rringal Jerman SMS Emdem madeg wonten ing lawang mlebet taman ing Oxford Street.

Cathetan suku besut

  1. [1] Archived 2013-09-27 at the Wayback Machine., (id) Wisata Kompasiana (dipun-akses tanggal 04 Januari 2013).
  2. a b [2] Archived 2013-03-12 at the Wayback Machine., (id) Wisata Alam Hyde Park (dipun-akses tanggal 04 Januari 2013).