Wangsa Candra

Wangsa Candra utawa Wangsa Soma ya iku salah siji wangsa kang misuwur ana ing legendha India, kang miturut gethok tular didhunaké déning Candra (Soma), déwa rembulan.^[1] Cathetan ngenani wangsa iki tinemu ana ing susastra Hindhu, kaya Purana, Mahabharata, Srimad Bhagawatam, lan sapanunggalané.^[1]

Wangsa kang isih sadulur karo wangsa iki ya iku Wangsa Surya, kang miturut gethok tular didhunaké déning Surya, déwa srengéngé.^[1] Wangsa Candra seduluran karo Wangsa Surya amarga leluhur saka kekaro wangsa iki duwé gegandhèngan kulawarga saka nikahan.^[1]

Sawisé pirang-pirang génerasi, Wangsa Candra kapérang dadi Wangsa Yadu lan Wangsa Puru.^[1] Ana ing Wangsa Puru, lair raja Bharata kang misuwur ana ing legendha India, kang garis keturunané dijenengi Wangsa Bharata.^[1] Ana ing Wangsa Bharata, lair Raja Kuru kang garis keturunané dijenengi Wangsa Kuru.^[1] Dadi ana ing Wangsa Candra akèh wangsa nanging sebeneré ana siji.^[1]

Legendha

Miturut ana ing cathetan Purana lan Mahabharata, wangsa iki didhunaké déning Candra, déwa rembulan.^[2] Candra palakrama karo Tara banjur duwé anak kang dijenengi Buda, déwa planit Merkurius.^[2] Buda palakrama karo Ila, putri Manu.^[2] Buda lan Ila duwé anak kang dijenengi Pururawa.^[2] Pururawa iki kang misuwur dadi raja pisanan saka Wangsa Candra, déné bapak lan kakiné ya iku déwa, dudu raja.^[2] Ibu saka Pururawa, Ila, ya iku putri Waiwaswata Manu. Dhèwèké seduluran karo Ikswaku, leluhur Wangsa Surya.^[2] Ila lan Ikswaku padha keturunan saka Surya, kang ndadèkaké antarané Wangsa Candra lan Surya duwé gegandhèngan kulawarga.^[2] Wangsa Yadu (wangsa Yadawa) ya iku cabangan saka Wangsa Candra, amarga Sang Yadu kang ngedegaké Wangsa Yadu iku keturunan Yayati, raja Wangsa Candra.^[2] Dadi, antarané Wangsa Yadu lan Candra uga duwé gegandhèngan kulawarga.^[2] Wangsa Yadu nyabang manèh dadi Wangsa Wresni (Warsneya), Wangsa Andhaka, lan Wangsa Bhoja.^[2] Kabèh wangsa iki duwé leluhur kang padha karo Wangsa Candra.^[2]