Swargarohanaparwa

Swargarohanaparwa iku carita Mahabharata kang dadi pérangan angka 18 lan kang pungkasan. Sing dicaritakaké iku:

Prabu Yudhisthira uninga sang Duryodana ana ing swarga kasungga-sungga. Sang Yudhisthira kersa uninga dunungé para rayi-rayi, banjur tindak rawuh ing naraka, kadhèrèkaké utusan, saka dhawuhé para Jawata. Ana ing naraka uninga sawernaning paukuman lan mireng sambaté wong-wong kang padha disiksa. Wasana kang padha kasiksa lan sambat-sambat wau rayi-rayi saha kulawargané. Sang Yudhisthira duka déné para Jawata ora adil. Sing andèrèkaké kadhawuhan mulih, sang Yudhisthira ora kersa bali saka naraka. Para Jawata padha rawuh, naraka banjur malih dadi swarga. Olèhé para Pandhawa ana naraka iku kahukum déné cidra marang sang guru, bagawan Drona lan liya-liyané; nanging saiki wis luwar.