Gwandong Palgyeong

Gwandong Palgyeong (8 Sesawangan éndah ing Gwandong) punika istilah kanggé sapérangan papan pariwisata ing pasisir wétan Ujung Koréa.[1] Saking rumiyin, tiyang Koréa dugi ing papan pariwisata ingkang mawi sesawangan ingkang éndah sinambi damel puisi, tembang lan lukisan kanggé nggambaraken raosing manah marang kaendahan papan-papan mau. Wonten kathah kawasan ing Koréa ingkang dados sesawangan ingkang éndah (gyeong). Sapérangan dipundamel kategori minangkaa isipigyeong ("12 sesawangan"), sipgyeong ("10 sesawangan"), palgyeong ("8 sesawangan"), yukgyeong ("6 sesawangan") lan samgyeong ("3 sesawangan").

Gwandong Palgyeong
Uisangdae, salah satunggal saking Gwandong Palgyeong
Jeneng Koréa
Hangul관동팔경
Hanja關東八景
Alihaksara Koréa Kang SinampurnaGwandong Palgyeong
McCune–ReischauerKwantong p'alkyŏng

8 Sesawangan besut

Gwandong Palgyeong tumuju ing 8 sesawangan ingkang wonten ing [[Gwandong. Papan ingkang wonten ing sisih wétan Jalur Daegwallyeong.[1] Wonten ing 8 papan punika dipunyasa pendopo-pendopo kanggé mirsani sesawangan.[1]

  • Cheongseokjeong ing Tongcheon. Wiwitanipun dipun-ginakaken kanggé nyebat pendopo ingkang dipundamel ing celak pasisir, nanging sapunika kanggé watu-watu inggil awujud pilar ingkang jumeneng kanthi jejeg. Cheongseokjeong punika lokasi kapisan ingkang mlebet ing kategori Gwandong Palgyeong.
  • Samilpo inggih punika satunggaling tlaga ing celakipun Désa Onjeong, Goseong. Dipunubengi déning bukit mawi watu-watu ing pérangan lèr lan kidul. Samil ateges "Tigang Dinten". Dipunnamani dhedhasar kisahipun para hwarang nalika masa karajan Silla ingkang naté manggèn wonten ing papan punika tigang dinten amargi ketarik déning sesawanganipun.
  • Cheongganjeong ing Ganseong punika satunggaling pendopo mawi tingkat kalih ingkang mapan wonten ing bukit ingkang ing sisihipun mili Kali Cheonggyeong (Cheonggyeongcheon) kanthi muara marang Laut Wétan.[2] Papanipun 7 km sisih lor Kota Sokcho. Saking dangu, wisatawan dugi ing mriki kanggé mirsani sesawangan pasisir lan srengéngé nalika medal.
  • Uisangdae ing Yangyang, pendopo ing kawasan Kuil Naksan (Naksansa).[3] Sesawangan ingkang katingal saking Pendopo Uisang punika Laut Wétan kanthi wit-wit cemara. Dipunparingi nama saking biksu Silla kanthi nama Uisang ingkang jaréné naté meditasi pinten-pinten jam madep laut ing papan punika.
  • Gyeongpodae, pendopo ingkang mapan ing sanginggiling bukit sisih kulon Gyeongpoho. Satunggaling tlaga papan pepanggihan toya sagara lan toya tawar. Pendopo Gyeongpo mapan kirang langkung 6 km sisih timur laut kutha Gangneung. Sampun dangu papan punika dipunrawuhi kanggé ningali pasisir nalika srengéngé medal lan nalika wanci sonten saha nalika wulan purnama.
  • Jukseoru ing Samcheok inggih punika satunggaling pendopo ing kategori Gwandong Palgyeong ingkang madep ing sisih kali kanthi nama Osipcheon. Benten kaliyan pendopo ing papan sanès ingkang madep sagara.[4] Jumeneng ing taun 1266, papanipun wonten ing Seongnae-dong, Kutha Samcheok.[4] Namaipun ateges Pendopo ing sisih kulon Wana Pring. Lokasi pendopo punika dipunubengi déning gunung ing tigang sisih, ingkang paling punika Gunung Bonghwang lan Gunung Galya, déné ingkang tebih wonten Gunung Taebaek.
  • Mangyangjeong ing Uljin punika pendopo ing bukit ingkang ing sisihipun mili Kali Bulyeong (Bulyeongcheon) dhateng Laut Timur. Ing sangandhaping bukit wonten pasisir mawi pasir putih kaliyan wit-wit cemara.
  • Wolsongjeong ing Pyeonghae.[5] Pendopo punika sampun dangu saged narik kawigatosan para pujangga ingkang remen marang kaéndahan pasisir lan wana cemara ing sakiwa tengenipun.[5] Ugi sesawangan ing tlatah punika sampun dipunremeni ing jaman Silla.[5] Wonten satunggaling carita kondhang bilih wonten sekawan Hwarang naté dugi ing papan punika.[5] Wolsongjeong ateges "Pendopo Cemara Wol" ingkang dipunnamani dhedhasar legénda bilih winih cemara ing mriki asalipun saking Negeri Yue (Wol).[5]

Gladri besut

Cathetan suku besut

Cithakan:Gwandong Palgyeong