Masjid Larabanga
Masjid Larabanga ya iku masjid kang kaprenah ing désa Larabanga, Ghana. Masjid iki minangka masjid kang tuwa dhéwé ing Ghana, lan uga salah sawijining kang paling tuwa ing laladan Afrika Kulon, mula uga karan minangka "Mekah ing Afrika Kulon". Masjid iki wis tau dipugar pirang-pirang ambalan awit diyasané taun 1421. Lembaga Monetèr Donya utawa WMF tau mènèhi pasumbang gedhé kanggo mugar masjid iki, banjur ndhaftaraké wangunan iki minangka salah siji saka 100 sana kang nyinamari cures. Pakaryan réstorasi iki uga ngetrapaké manèh kawruh babagan pangrumatan batako.
| Masjid Larabanga | |
|---|---|
 Masjid Larabanga | |
| Informasi umum | |
| Prenah |  Ghana |
| Koordhinat géografi | 9°13′13″N 1°51′36″W / 9.2203°N 1.8599°WKoordhinat: 9°13′13″N 1°51′36″W / 9.2203°N 1.8599°W |
| Afiliasi agama | Islam |
| Distrik | Dhistrik Gonja Kulon |
| Nagara | Ghana |
| Daerah | Laladan Savannah |
| Status | Digunakaké |
| Status | Aktif |
| Deskripsi arsitektur | |
| Arsitèk | Ayuba |
| Jinis arsitèktur | Masjid |
| Gaya arsitektur | Arsitèktur Gagrag Sudan-Saheli |
| Spesifikasi | |
| Dawa | 8 mèter |
| Amba | 8 mèter |
| Kubah | Siji |
| Menara | Siji |
| Bahan | Bata |
Ing masjid iki uga nyimpen Al-Quran lawas kang pinercaya déning brayat kiwa-tengen minangka bebungah saka swarga. Bebungah iku uga pinercaya minangka asil dongané imam Yidan Barimah Bramah ing taun 1650. Masjid iki kabangun mawa bata Afrika Kulon, nduwèni rong menara awujud piramid, siji iku minangka mihrab kang madhep ngétan nuju Mekah, déné kang liyané iku menara ing sisih lor-wétan. Masjid iki disangga klawan rolas dhasaran wujud bunder uga klawan élemèn kayu.
Prenah besut
Masjid iki kaprenah ing kutha Islam Larabanga saceraké Damongo ing Dhistrik Gonja Kulon, Wewengkon Savannah, Ghana. Kutha iki adohé udakara 15 kilomèter saloré Damongo, lan 4 kilomèter sakidulé gapura lumebu Taman Nasional Mole.[1] Ing saben manjing wanciné salat wajib lan uga saben Jumuwah, ana luwih saka satus priya lan wanita kang ngebaki masjid kanggo ngibadah sembahyang.[2]
Sajarah besut
Masjid Larabanga pinercaya dibangun déning wong-wong bangsa Moor ing abad ka-13 M.[3] Wondéné miturut sawijining carita, ing taun 1421, ana sawijining sudagar Islam aran Ayuba kang manggon ing papan saceraké Mystic Stone. Ayuba kang nama ganepé Ibrahim Ayuba al-Ansari iku teka saka Medinah awit préntah syèkh. Warga sakiwa-tengené nyritakaké manawa Ayuba iku asalé saka bani al-Najjar, ya iku salah sawijining suku ing Mekah. Bani al-Najjar iku uga ingaran minangka asal sukuné ibuné nabi Muhammad salallahu alaihi wa sallam.[4]
Ayuba ngimpi lan antuk wangsit supaya ngadegaké sawijining masjid. Ana kadadéan aèng, ya iku dhèwèké nemokaké yèn papan iku mau wis ana pondhasiné, mula dhèwèké kari nutugaké anggoné yasa masjid iku nganti rampung.[5][6] Para brayat percaya yèn dhèwèké iku ninggalaké wasiyat kang isiné panjaluké supaya disarèkaké ana papan saceraké masjid. Banjur telung dina sawisé, wit baobab kang thukul ana ing pasaréané iku supaya dirumat déning anak turuné. Wit baobab iku mau thukul ana sandhingé masjid, banjur misuwur minangka tetenger papan pasaréané Ayuba. Warga ing kutha Larabanga iku padha percaya manawa godhong lan lonjoraning wit baoba iku bisa nambani lelara.[5]
Ora kaya umumé masjid ing laladan kutha Afrika Kulon kang rata-rata ukurané gedhé, Masjid Larabanga itungané masjid kang cilik utawa malah bisa diarani langgar. Masjid-masjid ing padésan, kaya déné Larabanga iki, umumé dirumat déning marbot tunggal. Parumatan kaya mangkéné iki uga katrepaké ing papan liya, kaya ta Masjid Agung Djenné.[7] Amrih madhakaké wujud saèmper kaya déné umumé arsitèktur ing papan liyané, mula Masjid Larabanga nggabungaké cagak panyangga gedhé kanggo ngawékani bahan bangunan kang kurang antep.[7] Larabanga iku kalebu salah siji saka wolung masjid kang minulya ing Ghana lan uga salah sawijining masjid kang umuré wis tuwa. Mula masjid iki uga dadi papan jiyarah lan misuwur minangka "Mekah ing Afrika Kulon".[5][8]
Wujud besut
Saèmper karo masjid liyané ing Laladan Lor lan Savannah Ghana, Masjid Larabanga dibangun kalawan arsitèktur tradhisional gagrag Sudan-Sahel. Gagrag iki katon saka pamilihaning bahan-bahan lokal lan tèknik konstruksi. Déné Masjid Larabanga katon luwih prasaja tinimbang masjid-masjid liyané kang mapan ing pakuthan. Ambané masjid iki kurang luwih namung 8 x 8 mèter lan dibangun mawa bahan saka lempung, kayu, lan glagah.[4] Masjid iki nduwèni rong menara awujud piramid, siji iku minangka mihrab kang madhep ngétan nuju Mekah, déné kang liyané iku menara ing sisih lor-wétan. Masjid iki disangga klawan rolas dhasaran wujud bunder uga klawan élemèn kayu. Ana patang lawang kanggo lumebu menyang sajroning masjid. Saben-saben lawang iku mligi dadi dalan lumebu kanggoné kepala désa, priya, wanita, lan kanggo modin.[3]
Pariwisata besut
Ing masjid iki uga nyimpen Al-Quran lawas kang pinercaya déning brayat kiwa-tengen minangka bebungah saka swarga. Bebungah iku uga pinercaya minangka asil dongané imam Yidan Barimah Bramah ing taun 1650.[5] Warga sakiwa-tengené padha nyengkuyung pariwisata kang tembé bakal ngasilaké lan dadi pangupajiwané brayat agung. Séktor pariwisata iki ora namung ngawékani béya parumataning masjid, nanging uga ngundhakaké ékonominé masarakat ing kono.[9]
Rujukan besut
- ↑ "Larabanga Mosque". web.archive.org. 2013-10-29. Diarsip saka sing asli ing 2013-10-29. Dibukak ing 2020-03-12.
- ↑ Industry.co.id (2017-05-30). "Ini Dia Masjid Larabanga, Masjid Tertua di Afrika Barat". Industry.co.id (ing basa Indonesia). Dibukak ing 2020-03-12.
- ↑ a b "3 Masjid Unik Benua Hitam". Republika Online. 2017-06-19. Dibukak ing 2020-03-12.
- ↑ a b Yumna, Suha. "Menilik Masjid Larabanga, Unik dan Tertua di Afrika Barat". Muslimahdaily.com (ing basa Inggris Karajan Manunggal). Dibukak ing 2020-03-12.
- ↑ a b c d "Ghana Museums & Monuments Board". www.ghanamuseums.org. Dibukak ing 2020-03-12.
- ↑ Briggs, Philip,. Ghana : the Bradt travel guide (édhisi ka-Edition 6). Chalfont St. Peter, England. ISBN 978-1-84162-478-5. OCLC 859560342.
{{cite book}}: CS1 maint: extra punctuation (link) CS1 maint: multiple names: authors list (link) - ↑ a b Prussin, Labelle (1968). "The Architecture of Islam in West Africa". African Arts. 1: 32–35, 70–74.
- ↑ "Uniknya Masjid Larabanga, 'Makkah' dari Afrika Barat". Islampos (ing basa Indonesia). 2018-11-01. Dibukak ing 2020-03-12.
- ↑ Rainer, Leslie, 1960-; Rivera, Angelyn Bass,; Gandreau, David, (2011). Terra 2008 : Proceedings of the 10th international conference on the study and conservation of Earthen architectural heritage, Bamako, Mali, February 1-5, 2008. Los Angeles: Getty Conservation Institute/Getty Publication. ISBN 978-1-60606-043-8. OCLC 676727555.
{{cite book}}: CS1 maint: extra punctuation (link) CS1 maint: multiple names: authors list (link)
Kapustakan besut
- Briggs, Philip (4 Januari 2014). Ghana. Bradt Travel Guides. ISBN 978-1-84162-478-5.
- Prussin, Labelle (1968). "The Architecture of Islam in West Africa". African Arts. 1 (2): 32–35, 70–74. JSTOR 3334324.
{{cite journal}}: CS1 maint: ref duplicates default (link) - Rainer, Leslie H.; Rivera, Angelyn Bass; Gandreau, David (2011). Terra 2008. Getty Publications. ISBN 978-1-60606-043-8.
Pranala njaba besut
| Wikimedia Commons duwé médhia ngenani Larabanga Mosque. |
